राष्ट्र, राष्ट्रियता, धर्म संस्कृति तथा नागरिक बचाउ महाअभियानका संयोजक दुर्गा प्रसाईंको घरबाट नियन्त्रणमा लिइएका मोबाइल र ल्यापटप फरेन्सिक जाँचका लागि पठाइएको छ।
बिहीबार राति काठमाडौं उपत्यका अपराध अनुसन्धान कार्यालय र जिल्ला प्रहरी परिसर भक्तपुरको टोली उनको घरमा पुगेर खानतलासी गरेको थियो।
घरबाट प्रहरीले ६ वटा मोबाइल, एउटा ल्यापटप र सिसिटिभीको रेकर्डर रहने डिभाइस नियन्त्रणमा लिएको हो।
अपराध अनुसन्धान कार्यालयका एसएसपी सन्तोष खड्काले अनुसन्धानका लागि नियन्त्रणमा लिइएको बताए।
ती डिभाइसलाई प्रहरीको केन्द्रीय विधि विज्ञान प्रयोगशालामा पठाइएको हो।
‘भक्तपुर परिसरमा विचाराधीन मुद्दाको अनुसन्धानका लागि ती डिभाइसहरू नियन्त्रणमा लिइएका हुन्,’ उनले भने, ‘फरेन्सिक जाँचका लागि प्रयोगशाला पठाएका छौं।’
उनले कुन कसुर भन्ने विषयमा यकिन गर्नका लागि जिल्ला प्रहरी परिसर भक्तपुरलाई जानकारी हुने बताए। यद्यपि भक्तपुर परिसरले पनि त्यस विषयमा जानकारी दिन मानेको छैन।
डिएसपी दीपक कार्कीले अनुसन्धानका लागि मोबाइललगायत सामग्री नियन्त्रणमा लिइएको बताए पनि कुन कसुरमा हो खुलाएनन्।
‘अनुसन्धानको विषय सबै मलाई थाहा हुन्न। मैले अनुसन्धान अधिकृतलाई सोध्ने पनि मिल्दैन,’ उनले सेतोपाटीसँग भने।
कुन कसुरमा भइरहेको अनुसन्धानलाई लिएर प्रहरी प्रसाईंको घरभित्र पसेको भन्ने प्रश्न गर्दा पनि उनले जानकारी दिएनन्।
‘सर्च गरेपछि त्यहाँ भेटिएको चिजबाट अरू केही विषय आयो भने त्यो अर्को कसुर हुनसक्छ,’ उनले भने, ‘अनुसन्धानकै विषय भयो। दुई चार दिन पछि केही खुल्यो भने आउने भयो।’
प्रहरीले दुर्गा प्रसाईंलाई पटक-पटक पक्राउ गर्दै आएको छ।
