बागलुङको काठेखोला गाउँपालिका–३ माझँकटेरामा सँगै लेबर काम गर्ने साथीको धारिलो हतियार (चक्कु) प्रहार गरी हत्या गरेको आरोपमा प्रहरीले दुई जनालाई पक्राउ गरेको छ।
पक्राउ पर्नेहरूमा ढोरपाटन नगरपालिका–६ घर भएका २५ वर्षीय अर्जुन घर्ती मगर र ढोरपाटन नगरपालिका–५ घर भएका ३६ वर्षीय रिखे दमाई रहेका छन्।
उनीहरूमाथि ढोरपाटन नगरपालिका–५ बस्ने ३६ वर्षीय अशोक खत्रीको हत्या गरेको आरोप छ।
प्रहरीका अनुसार गत साउन २६ गते राति अन्दाजी ९:४० बजेको समयमा काठेखोला गाउँपालिका–३ स्थित श्री निर्मल आधारभूत विद्यालयको पुरानो भवनमा बस्दै आएका खत्रीमाथि अर्जुन घर्ती मगरले धारिलो चक्कु प्रहार गरेका थिए। हतियार प्रहारबाट गम्भीर घाइते भएका खत्रीको घटनास्थलमै मृत्यु भएको थियो।
घटनाको सूचना पाउनेबित्तिकै खटिएको प्रहरी टोलीले स्थानीयको सहयोगमा भागिनसकेका घर्ती मगर र दमाईलाई सोही दिन राति काठेखोला–३ धम्जा माझँकटेराबाट नियन्त्रणमा लिएको हो।
फोनको कुराकानीबाट सुरू भएको थियो विवाद
प्रारम्भिक अनुसन्धान अनुसार उनीहरू साउन २० गते स्थानीय देबेन्द्र खत्रीको ओखरको बिरूवा रोप्ने कामका लागि घरबाट हिँडेका थिए।
बीचबाटोबाट खत्री घर फर्किए पनि अन्य दुई जना काममा पुगेका थिए। पछि साउन २४ गते खत्री पनि सोही स्थानमा पुगेपछि तीनै जना सँगै बस्दै आएका थिए।
साउन २५ गते राति फोनमा ठूलो स्वरमा कुरा गरेको विषयलाई लिएर उनीहरूबीच सामान्य झैझगडा भएको थियो। त्यसको भोलिपल्ट (साउन २६ गते) काम सकेर मादक पदार्थ सेवन गर्ने क्रममा अघिल्लो दिनको विषयलाई लिएर पुनः विवाद हुँदा घर्ती मगरले खत्रीमाथि चक्कु प्रहार गरेको अनुसन्धानबाट खुलेको छ।
मृतक खत्रीका १२, ९ र ७ वर्षका तीन छोरा छन् भने उनकी श्रीमती पुनः गर्भवती रहेकी छन्। सम्पूर्ण परिवार खत्रीकै कमाइमा आश्रित रहँदै आएको थियो। मृतककी श्रीमती दिलमाया भण्डारीले कर्तव्य ज्यान कसुरमा किटानी जाहेरी दिएकी छन्।
प्रहरीले वारदातमा प्रयोग गरिएको चक्कु र रगत लागेका कपडाहरू बरामद गरेको छ।
पक्राउ परेका दुवै जनालाई अदालतबाट म्याद थप गरी घटनाबारे थप अनुसन्धान भइरहेको प्रहरीले जनाएको छ।
