चीनको तिब्बत हुँदै भोटेकोशी नदीमा आएको बाढीले नुवाकोटको त्रिशूली नदी किनारस्थित त्रिशूली बजार र ढुंगे बजारमा ठूलो क्षति भएको छ।
बाढीले बगाएर ल्याएको लेदो र हिलो १०० देखि ३०० सय मिटर माथि रहेको सडक सतहसम्म थुप्रिएको छ। त्रिशूली र ढुंगे बजारमा नदी किनार रहेका घरमध्ये कुनै पनि सग्लो अवस्थामा छैन।
त्रिशूली बजारबाट काठमाडौं आउने राजमार्गमा रहेका नयाँ र पुरानो गरी दुवै पुल बाढीले भत्काइदिएको छ। यसले नदीपारि रहेका मानिस पारि नै अड्किएका छन्। बजारमै रहेको यस क्षेत्रको मुख्य स्कुल त्रिभुवन त्रिशूली माध्यमिक विद्यालयका भौतिक संरचना बाढीले सखाप पारेको छ।
त्यस्तै, बजारमै रहेको २१ मेगावाटको त्रिशूली जलविद्युत आयोजनाको बाँध र अन्य संरचना पनि बाढीले ठूलो क्षति पुर्याएको छ।
बिदुर नगरपालिका वडा नम्बर १ मा पर्ने त्रिशूली र ढुंगे बजारमा भएको क्षति र यहाँको अहिलेको अवस्थाबारे हामीले वडाध्यक्ष लेनिन रञ्जितसँग कुरा गरेका छौं।
उनले त्रिशूली बजारको नदी किनारका भौतिक संरचना सबैजसो सखाप भएको जानकारी दिए।
'यहाँका कुल ४०० घरमा क्षति पुगेको अनुमान छ। अझै योभन्दा धेरै पनि हुन सक्छ। हामी अहिले लगत संकलनकै क्रममा छौं,' उनले भने।
उनका अनुसार अहिलेसम्म बजार क्षेत्रमा मात्र १५-२० जना मान्छे सम्पर्कविहीन छन् भने ७-८ जनालाई नदीले बगाएको देखिएको थियो। उनीहरूको खोजी जारी छ। हराइरहेकाहरूसँग पनि सम्पर्क गर्ने प्रयास हुँदैछ।
उनका अनुसार त्रिशूली बजारमा नदीको जल सतहभन्दा करिब १०० मिटरमाथिसम्म लेदो र हिलो थुप्रिएको छ। माथिल्लो ढुंगे बजार त जल सतहभन्दा करिब ३०० मिटर माथि पर्छ। बाढीले त्यहाँसम्म हिलो र लेदो थुपारेको उनले बताए।
त्रिशूली बजार र ढुंगे बजार क्षेत्रमा बढी क्षति पुगेको जानकारी दिँदै उनले भने, 'त्रिशूली बजारको नयाँ र पुरानो दुवै पुल बाढीले बगाएको छ। नदीपारिका मानिसहरू पारि नै अड्किएका छन्। त्रिशूली र तल्लो ढुंगे बजार त आधा सखाप भएको छ।'
यति ठूलो बाढी र यति ठूलो भौतिक क्षति हुँदा पनि समयमै सूचना प्रवाह गर्न सकेकाले मानवीय क्षति कम भएको उनको भनाइ छ।
'हामीले माथिबाट बाढी आउँदैछ भन्ने कुरा झन्डै ४५ मिनेट अगाडि नै थाहा पाएका थियौं। सूचना पाउनेबित्तिकै सामाजिक सञ्वालबाट सन्देश प्रवाह गर्यौं। नदी किनारका घरहरूमा रहेका मान्छेलाई तुरून्तै सुरक्षित ठाउँमा सारियो। म आफै नदी किनारका घर घरमा गएर मान्छे हटाएको थिएँ। हामीले प्रत्येक घरमा गएर सतर्क गरायौं। प्रहरी र सशस्त्र प्रहरीले पनि माइकिङ गरेको थियो,' उनले भने।
बेलेमा सूचना प्रवाह गरेर मानवीय क्षति कम गराए पनि अनपेक्षित रूपमा आएको बाढीबाट भौतिक क्षति भने जोगाउन सकिएन।
वडध्यक्ष रञ्जित त्रिशूली बजारमा रहेको आफ्नै घर पनि क्षतिग्रस्त भएको बताउँछन्।
'नदी किनारमा रहेका जलविद्युत आयोजनादेखि स्कुल र आवासीय भवनहरू कुनै पनि जोगिएन। सबैमा धेरै-थोरै क्षति पुगेको छ,' उनले भने।
करिब ८०० विद्यार्थी अध्ययन गर्ने त्रिभुवन त्रिशूली माध्यमिक विद्यालयको भौतिक संरचनामा क्षति पुगे पनि त्यहाँका विद्यार्थीलाई बेलैमा स्कुलबाट हटाइएको उनले जानकारी दिए।
'हामीले सबैजसो विद्यार्थीलाई स्कुल परिसरबाट हटाएर माथिल्लो ठाउँतिर लगेका थियौं। त्यसैले मानवीय क्षति भएको छैन। एक-दुई जना विद्यार्थी भने हराइरहेको सूचना आएको छ। हामी थप कुरा बुझ्दैछौं,' वडाध्यक्ष रञ्जितले भने।
अहिले त्रिशूली नदीमा पानीको मात्रा कम हुँदै गएपछि सडक सतहमा थुप्रिएको हिलो र लेदो डोजर लगाएर हटाउने काम भइरहेको उनले जानकरी दिए।
तस्बिरमा हेर्नुहोस्, त्रिशूली र ढुंगेको अवस्था —
-1787736824.jpeg)
-1787736824.jpeg)
-1787736824.jpeg)
-1787736824.jpeg)
-1787736824.jpeg)
-1787736824.jpeg)
-1787735847.jpg)
-1787735846.jpg)
-1787735846.jpg)
-1787735844.jpg)
-1787735845.jpg)
-1787735845.jpg)
-1787735845.jpg)
