व्यवसायी तथा कन्टेन्ट क्रियटर दिपा सिम्खडाले बाढी तथा प्राकृतिक विपत्तिबाट प्रभावित नागरिकको सहयोगका लागि २५ लाख रूपैयाँ बराबरको कपडा निःशुल्क दिने घोषणा गरेकी छन्।
बिहीबार सामाजिक सञ्जालमा पोस्ट लेख्दै उनले यस्तो घोषणा गरेकी हुन्।
आफू व्यवसायीका रूपमा मात्र नभइ यो देशको छोरीका रूपमा विपत्तिको समयमा आफ्नो कर्तव्य पूरा गर्न चाहेको बताएकी छन्।
दिपाका अनुसार उनको पसलमा हाल करिब ५० लाख रूपैयाँ बराबरको कपडा छ।
उनले भनेकी छन्, 'मेरा दिदीबहिनीहरू आधारभूत आवश्यकताबाट वञ्चित भएर बस्नुपरेको बेला मेरो पसलमा सजाएर राखिएका ती कपडाहरूको कुनै अर्थ म देख्दिनँ। कपडा भनेकै शरीर ढाक्नको लागि हो, र यो जरूरत भएका मानिसहरूले नै पाउनुपर्छ। त्यसैले म आज घोषणा गर्न चाहन्छु। मेरो पसलमा भएको अहिले लगभग ५० लाख मूल्य बराबरको कपडाबाट ५० प्रतिशत अर्थात् २५ लाख रूपैयाँ बराबरको कपडा निःशुल्क रूपमा दिन चाहन्छु।'
दिपाले उक्त सहयोग वास्तविक रूपमा आवश्यकता परेका मानिससम्म पुगोस् भन्ने चाहना राखेकी छन्। सरकारी निकाय वा राहतमा सक्रिय विश्वसनीय संस्थामार्फत सहयोग वितरण गर्न आफू इच्छुक रहेको उनले उल्लेख गरेकी छन्।
उनले विपत्तिको समयमा व्यापारभन्दा मानवीय सहयोगलाई प्राथमिकता दिन व्यवसायीहरूलाई आग्रह गरेकी छन्। संकटका बेला प्रभावित नागरिकको बाध्यताबाट फाइदा उठाएर व्यापार गर्नु उचित नहुने बताएकी छन्।
दिपाले आफूले सक्ने सहयोग गर्न सबैलाई आग्रह गर्दै भनेकी छन्- 'मसँग कपडा थियो, म कपडा दिँदैछु। तपाईंसँग खाना छ भने खाना दिनुहोस्। तपाईंसँग ठाउँ छ भने आश्रय दिनुहोस्। तपाईंसँग पैसा छ भने पैसा दिनुहोस्। तपाईंसँग हात छ भने उद्धारमा सहयोग गर्नुहोस्।'
आफूले गर्न लागेको सहयोगलाई प्रचारको माध्यम नबनाउन पनि उनले आग्रह गरेकी छन्।
दिपा व्यापारीसँगै कन्टेन्ट क्रियटर समेत हुन्। उनले संचालन गर्ने 'डी-स्टोरी' पछिल्लो समय चर्चामा छ।
