बुधबारको विनाशकारी बाढीपछि रसुवाको गोसाइँकुण्ड गाउँपालिकाका अध्यक्ष कैसाङ नुर्पु तामाङ र उपाध्यक्ष प्रतिमा तामाङ (गुरूङ) अझै सम्पर्कमा आएका छैनन्।
बिहीबार दिउँसोसम्म पनि गाउँपालिकाका अध्यक्ष र उपाध्यक्ष मात्र नभई बाढीबाट अतिप्रभावित वडा नम्बर २ (टिमुरे) र वडा नम्बर ५ (स्याफ्रुबेसी) का अध्यक्षहरू समेत सम्पर्कविहीन छन्।
गाउँपालिकाका यी पदाधिकारीहरू अहिलेसम्म सम्पर्कमा नरहेको जानकारी हामीलाई वडा नम्बर २ का कार्यपालिका सदस्य पेमा दोर्जे घलेले दिएका हुन्।
उनी आफै पनि खाना खाँदा खाँदै बाढी पसेपछि भागेर बाँचेका थिए। त्यसपछि हेलिकप्टरमा उद्धार गरेर काठमाडौं ल्याइएका उनी दिदी-बहिनीसहित सिँगो परिवार नै बाढीले बगाएको बताउँछन्।
उनका अनुसार बुधबार बिहान साढे ८ बजेतिर खाना खान लागिरहेका बेला एक्कासि ठूलो आवाज आएको थियो। लगत्तै बाढी बस्तीमा पस्यो।
'बाढी पस्दा जमिनबाट धुवाँ निस्किएजस्तै भएको थियो, एकैछिनमा सबै घरहरू पुरिए,' उनले सम्झिए।
उनका अनुसार पूर्वसूचना केही नभएकाले एक्कासि बाढी पसेपछि दौडिन सक्नेहरू भागे भने बाँकी कता गए केही थाहा छैन। भाग्न नसक्नेहरूलाई बाढीले बगाएको र धेरै मानिस सम्पर्कविहीन भएको उनले जानकारी दिए।
'बाढी आएको देख्नेबित्तिकै चप्पलसमेत नलगाई भागेर बाँचेँ। यसो जुत्ता खोज्न थालेको भए मलाई पनि बगाउँथ्यो,' उनले भने, 'मेरो दिदीबहिनीको परिवार नै बगाएको छ, उनीहरू अहिलेसम्म सम्पर्कविहीन छन्।'
घलेलाई बुधबार साँझ नेपाली सेनाको हेलिकप्टरमा उद्धार गरेर काठमाडौं ल्याइएको हो। उनी अहिले काठमाडौंमै छन्। उनका छोरा र श्रीमती पहिलेदेखि नै काठमाडौंमा बस्दै आएका थिए।
आफू बाढीबाट जोगिएपछि उनले स्थानीय जनप्रतिनिधिहरूसँग सम्पर्क गर्ने प्रयास गरेका थिए। तर बिहीबारसम्म पनि कसैसँग सम्पर्क हुन नसकेको उनी बताउँछन्।
'अध्यक्षज्यू सम्पर्कविहीन हुनुहुन्छ। उपाध्यक्षको परिवार नै बगायो भन्ने सुन्नमा आएको छ,' उनले भने, 'बेपत्ता हुनेहरू त भइहाले, बाँकी रहेकाहरूको पनि उद्धार हुन नसकेको खबर आइरहेको छ।'
बाढीपीडितहरूले प्रभावित क्षेत्रमा सरकारी टोली तथा स्थानीय जनप्रतिनिधिहरूको उपस्थिति नरहेको र राहत पुग्न नसकेको दुःखेसो गरिरहेका छन्। तर सडक सम्पर्क टुटेकाले तत्काल त्यहाँ पुग्न आफ्नो हातमा केही नभएको घले बताउँछन्।
नेपाली सेनाको हेलिकप्टरमा आफूसहित केही स्थानीयलाई काठमाडौं ल्याइए पनि बाढीबाट बाँचेका धेरै मानिस अझै प्रभावित क्षेत्रमै अलपत्र परेको गुनासो उनीसम्म पुगेको छ।
'बिहीबार केही स्थानीय बासिन्दासँग कुरा भएको थियो। उहाँहरूले सोधपुछ गर्न र उद्धार गर्न कोही नआएको बताउनुभएको छ। उहाँहरूलाई तत्काल उद्धार गर्न पाए हुन्थ्यो,' घलेले भने, 'गाउँपालिका अध्यक्ष, उपाध्यक्ष मात्र नभई वडाध्यक्षहरू नै बेपत्ता छन्। अरू कुनै जनप्रतिनिधि पनि सम्पर्कमा छैनन्, सिँगो गाउँ नै जनप्रतिनिधिविहीनजस्तै बनेको छ।'
बाढी र पहिरोपछि सञ्चार सम्पर्क विच्छेद भएकाले धेरै स्थानीयले आफ्ना आफन्त, दिदीबहिनी तथा ज्वाइँहरूको अवस्था अझै थाहा पाउन सकेका छैनन्।
साथै, हेलिकप्टरबाट उद्धार गरी सुरक्षित ठाउँमा पुर्याइएकाहरूका लागि समेत खानेकुराको उचित व्यवस्था हुन नसकेको गुनासो आएको उनी बताउँछन्।
-1787837545.jpg)
