चितवन प्रशासनले बाढीमा परी मृत्यु भएका र अहिलेसम्म पहिचान हुन नसकेका शवहरू जमिनमुनि व्यवस्थापन गर्ने भएको छ।
शवहरू सड्न थालेको र त्यसले महामारीको जोखिम बढेका कारण शनिबार पहिचान हुन नसकेका २२९ शवहरू जमिन मुनि व्यवस्थापन गर्ने निर्णय गरेको चितवन प्रशासनले जनाएको छ।
प्रशासनले हालसम्म बाढीमा २३३ वटा शव संकलन भएको र तीमध्ये चार वटा शवकै मात्रै पहिचान भएको जनाएको छ।
२२९ वटा शव तथा शवका अवशेष होल्डिङ सेन्टर तथा स्वास्थ्य संस्थामा रहेका छन्।
'होल्डिङ्ग सेन्टर र स्वास्थ्य संस्थाहरु तथा नदी तटबाट संकलन भएका शव / शवका अवशेषहरु सडेगलेका र अब पहिचान हुन/गर्न नसकिने अवस्थामा छन्,' प्रशासनले जारी गरेको सूचनामा भनिएको छ, 'तत्कालिक व्यवस्थापकीय प्रबन्धबाट राखिएका त्यस्ता शवहरु दुर्गन्धित बन्दै गएका कारण संक्रमण/महामारी फैलिन सक्ने भन्ने स्वास्थ्य क्षेत्रका विज्ञहरुको राय/विश्लेषण रहेको छ।'
शवहरू थप सड्न र गल्न नदिन तथा सम्मानजनक, सुरक्षित र कानुनी रूपमा व्यवस्थापन गर्नुपर्ने बाध्यात्मक अवस्था सिर्जना भएको पनि प्रशासनले जनाएको छ।
जिल्ला सुरक्षा समितिले पहिचान नभएका तथा बेवारिसे शव व्यवस्थापनसम्बन्धी निर्देशिकाअनुसार सबै शव जमिनमुनि व्यवस्थापन गर्ने निर्णय गरेको हो।
'प्राप्त शवहरु थप सड्न/गल्न नदिन, त्यस्ता शवहरुको सम्मानजनक, सुरक्षित र कानूनी रुपमा व्यवस्थापन गरी सम्भावित संक्रमणको जोखिमबाट बचाउन बाध्यात्मक विकल्पको रुपमा जिल्ला सुरक्षा समिति चितवनको आज मिति २०८३।०५।१३ को निर्णयानुसार पहिचान नभएका तथा वेवारिसे शव व्यवस्थापन (पहिलो संशोधन) निर्देशिका, २०८३ बमोजिम सबै शवहरु जमिनमूनि व्यवस्थापन गर्ने निर्णय भएको छ,' प्रशासनले भनेको छ।
सबै शवको डीएनए नमुना भने संकलन गरिनेछ।
'यस निर्णय बमोजिम सबै शवहरुको DNA नमूना संकलन गरी संकेत नम्बरका आधारमा अभिलेख राख्ने गरी आजैदेखि भरतपुर महानगरपालिका वडा नं. १ देवघाटस्थित खुला स्थानमा व्यवस्थापन गरिने व्यहोरा सम्बन्धित सबैको जानकारीको लागि अनुरोध छ,' विज्ञप्तिमा भनिएको छ।
प्रशासनले यसलाई बाध्यात्मक परिस्थिति भनेको छ।
'बाध्यात्मक परिस्थितिबाट श्रृजित यस निर्णयबाट पिडित परिवारलाई पर्न गएको असुविधाप्रति क्षमाप्रार्थी छौं,' प्रमुख जिल्ला अधिकारी गणेश अर्यालद्वारा जारी सूचनामा उल्लेख छ।
-1787825453.jpg)
