ऊर्जा, जलस्रोत तथा सिचाईंमन्त्री विराजभक्त श्रेष्ठले रसुवा बाढीबाट विभिन्न जलविद्युत आयोजनाको सुरुङमार्गमा फसेका मजदुर, कर्मचारी र स्थानीयको उद्धारको लागि उद्धार टोली सुरूङसम्म पुग्ने प्रयासमा रहेको बताएका छन्।
सुरूङभित्र फसेहरुको परिवारसँग मन्त्रालयमा शनिबार भेट्दै मन्त्री श्रेष्ठले भने बेलुकासम्म सुरूङ भेट्ने सम्भावना रहेको बताएका हुन्।
मन्त्री श्रेष्ठले सुरूङमा फसेकाहरुको उद्धारको लागि शुक्रबारदेखि डेडिकेटेड हेलिकप्टर परिचालन गरेको जानकारी गराए।
श्रेष्ठले राति पनि खोज तथा उद्धार र सुरूङको प्रवेश द्वार खोल्ने काम भइरहेको बताए।
'राति पनि काम रोकेका छैनौं। राति रोक्यो भने आसै मर्छ। जे जस्तो छ भेटाउन सकिन्छ भन्नका लागि बरु हाफ सिफ्ट गरेर हुन्छ कि पालो फेरेर हुन्छ कि निरन्तरता दिइरहेका छौं,' उनले भने।
खोजी तथा उद्धारका लागि नेपाल विद्युत प्राधिकरण र मन्त्रालयबाट उच्च तहका विज्ञ अधिकारीहरु परिचालन गरिएको मन्त्री श्रेष्ठले बताए।
'हाम्रो नुवाकोटको ट्याक्टिकल अफिसले सक्रियरुपमा काम गरेको छ। सिनियर लेभलको म्याजेनमेन्ट टिम नुवाकोटमा छ। अर्को सिनियर लेभलको टिम रसुवामा छ,' उनले भने।
मन्त्री श्रेष्ठले उद्धारका लागि आवश्यक स्रोत, साधन र समन्वयका लागि मन्त्रालय प्रतिबद्ध रहेको पनि बताए।
मन्त्री श्रेष्ठले सुरूङभित्र फसेका नागरिकको ज्यान जोगाउनु सरकारको पहिलो प्राथमिकता भन्दै कुनै माध्यमबाट अक्सिजन पुर्याउन प्रयासरत रहेको बताए। 'उद्धार हुनुअघि कुनै माध्यमबाट अक्सिजन सुरूङभित्र पुर्याउन प्रयासरत छौं।
उद्धार भएपछि त अस्पतालमा पनि राख्न सकिन्छ। पहिला जिवित हुनुपर्छ। त्यसका लागि अक्सिजन कुनै पाइपबाट पुर्याउन सकिन्छ कि भनेर लागेका छौं,' उनले भने।
मन्त्रालयले पीडित परिवारलाई नियमित आधिकारिक सूचना दिने पनि मन्त्री श्रेष्ठले प्रतिबद्धता जनाए।
ऊर्जा मन्त्री श्रेष्ठसँगको भेटमा पीडित परिवारका सदस्यले तीनवटा माग गरेका थिए।
पीडित परिवारले सुरूङभित्र जीवित वा मृत्यु के अवस्था हो छिटोभन्दा छिटो जानकारी दिनुपर्ने माग राखेका थिए। यसैगरी सुरूङभित्र बाच्ने व्यवस्था मिलाउनुपर्ने, कम्तीमा अक्सिजनको व्यवस्था गरिदिनुपर्यो भनेका थिए।
यसैगरी उद्धारका लागि इक्विपमेन्टको जे जे चाहिन्छ व्यवस्था गरिदिनुपर्यो भनेका थिए।
रसुवा बाढीबाट १२ वटा जलविद्युत आयोजनामा क्षति पुगेको छ भने विभिन जलविद्युत आयोजनाको सुरूङभित्र पाँचसय भन्दा बढी मजदुर, कर्मचारी र स्थानीय फसेका छन्।
