लगातार भइरहेको वर्षासँगै सम्भावित जोखिमलाई ध्यान दिँदै काठमाडौं उपत्यकाबाट बाहिरिने सवारीसाधन नागढुंगामा होल्ड गरिएको छ।
बिहीबार बेलुकी ८ बजेदेखि यात्रुवाहक तथा मालवाहक सवारीसाधन, मोटरसाइकललगायत सम्पूर्ण सवारीसाधन नागढुंगा क्षेत्रमा रोकिएको हो।
पृथ्वी राजमार्गको कृष्णभिर, कुरिनटारनजिकै धारापानीलगायत क्षेत्रमा पहिरो र सडक भासिएको छ। पहिरो हटाउने कार्य भइरहेको छ।
जिल्ला प्रशासन कार्यालय धादिङ र चितवनले सूचना निकालेर राजमार्गमा सवारी साधन सञ्चालन नगर्न आग्रह गरेका छन्।
वर्षाका कारण सडकमा हुनसक्ने पहिरो, ढुंगा खस्ने तथा सडक अवरुद्ध हुनसक्ने जोखिमलाई मध्यनजर गर्दै सुरक्षा सतर्कताका रूपमा सवारीसाधन रोकिएको जनाइएको छ।
नागढुंगा–नौबिसे सडकखण्ड हुँदै धादिङ, चितवन, पोखरा, गोरखालगायत विभिन्न जिल्लातर्फ जाने सवारीसाधनलाई नागढुंगामै रोकेर राखिएको छ। लामो दूरीका यात्रुवाहक बस तथा मालवाहक सवारीसाधनसमेत होल्डमा परेपछि यात्रु तथा चालकहरू प्रभावित भएका छन्।
लगातारको वर्षाका कारण सडकखण्डका विभिन्न स्थानमा पहिरो तथा सडकमा लेदो आउन सक्ने सम्भावना रहेकाले जोखिमको अवस्था हेरेर मात्रै सवारीसाधन सञ्चालनमा ल्याइने बताइएको छ। सडकको अवस्था र मौसममा सुधार आएपछि सुरक्षा निकाय तथा सम्बन्धित निकायको समन्वयमा सवारी साधनलाई क्रमशः गन्तव्यतर्फ पठाइने तयारी गरिएको छ।
सम्भावित जोखिमका कारण यात्रुलाई अनावश्यक रूपमा यात्रा नगर्न तथा लामो दूरीको यात्रा गर्नुअघि सडकको अवस्था बुझेर मात्र प्रस्थान गर्न आग्रह गरिएको छ। वर्षाका कारण नागढुंगा–नौबिसे सडकखण्डमा सवारीसाधनको चाप बढ्न सक्ने भएकाले यात्रुलाई धैर्य गर्नसमेत अनुरोध गरिएको छ।
तस्बिरहरू: नेपाल फोटो लाइब्रेरी।
.JPG)
-1746009348.jpg)
