बैतडीमा घरको छानो फोडेर चोरी गरेको आरोपमा नगर कार्यपालिका सदस्यसहित चार जना पक्राउ परेका छन्।
पक्राउ पर्नेमा दशरथचन्द नगरपालिका–५ का ४९ वर्षीय विनोद लोहार, २७ वर्षीय तबिराम लोहार, २६ वर्षीय महेशराम लोहार र दशरथचन्द नगरपालिका–८ का ३७ वर्षीय लक्ष्मणसिंह मौनी छन्।
दशरथचन्द नगरपालिका–५ का वडाध्यक्ष केशवराज लेखकका अनुसार पक्राउ परेका विनोद नगरपालिकाका मनोनित कार्यपालिका सदस्य हुन्।
जिल्ला प्रहरी प्रमुख डिएसपी दीपकुमार रायका अनुसार भदौ १० गते राति करिब ११ बजेतिर चार जनाले दशरथचन्द–५ आला गाउँका मधुसुदन भट्टको घरको छानो फोडेर चोरी गरेका थिए। उनीहरूले सोही गाउँका राजेन्द्र भट्टको घरको ढोका पनि फोडेर सुनका गरगहना, नगद र भाँडाकुँडा चोरी गरेको प्रहरीको भनाइ छ।
घटना भएको समयमा दुवै घरमा कोही थिएनन्। मधुसुदन जागिरको सिलसिलामा काठमाडौंमा थिए। घरमा बस्ने उनकी आमा लडेर हात भाँचिएपछि उपचारका लागि काठमाडौं गएकी थिइन्। राजेन्द्रको परिवार पनि घरमा नरहेको प्रहरीले जनाएको छ।
मधुसुदनको घरको छानो फोडिएको देखेपछि छिमेकीले प्रहरीलाई खबर गरेका थिए। प्रहरीले घटनाबारे अनुसन्धान अघि बढाउँदै चोरीमा संलग्न हुन सक्ने व्यक्तिमाथि निगरानी गरिरहेको थियो।
अनुसन्धानका क्रममा प्रहरीले कवाडीको कारोबार गर्ने लक्ष्मणसिंह मौनीलाई सोधपुछका लागि नियन्त्रणमा लिएको थियो। डिएसपी रायका अनुसार मौनीले चोरी भएका भाँडाकुँडा भारतको झुलाघाटमा लगेर बिक्री गरेको बयान दिएका थिए। उनले ती सामान आफूलाई कस–कसले दिएको भन्नेबारे पनि बयान दिएका थिए।
त्यसपछि प्रहरीले अन्य व्यक्तिको घरमा खानतलासी गरेको थियो। खानतलासीका क्रममा कार्यपालिका सदस्य विनोद लोहारको घरबाट मधुसुदनको घरमा चोरी भएको एउटा पितलको भगवतीको मूर्ति र खुकुरी बरामद भएको प्रहरीले जनाएको छ।
मधुसुदन एक साताअघि घर फर्किएपछि प्रहरीले उनलाई विनोदको घरबाट बरामद सामान देखाएको थियो। उनले मूर्ति र खुकुरी आफ्नै घरबाट चोरी भएको पहिचान गरेपछि विनोदको संलग्नता खुलेको डिएसपी रायले बताए।
अन्य दुई जनाको घरबाट भने हालसम्म चोरीका सामान फेला नपरेको प्रहरीले जनाएको छ।
‘चोरीपछि तीन जना मिलेर चोरीका भाँडाबर्तन कवाडीका लक्ष्मणसिंह मौनीलाई बेचेको र मौनीले छिमेकी देश भारतको झुलाघाटमा लगेर बेचेको खुलेको छ,’ डिएसपी रायले भने, ‘अर्काको देशमा पुर्याएर बिक्री भइसकेका ती चोरीका भाँडाबर्तन फेला पर्ने सम्भावना कम रहे पनि चोरीमा उनीहरूको संलग्नता छ भन्ने कुरा प्रारम्भिक बयानका क्रममा उनीहरूले स्वीकार गरिसकेका छन्।’
प्रहरीका अनुसार चार जनाको समूहले मधुसुदनको घरबाट तामाको ताउला चार वटा, तामाको पूजा थाली एक वटा, तामाको लोटा तीन वटा, पितलको बाँटा १० वटा, तामाको मानो एक वटा, पितलको ताउला छ वटा, पितलको थाल सात वटा, काँसको थाल छ वटा, पितलको लोटा आठ वटा, पितलको लोटा चार वटा, तामाको गाग्री पाँच वटा, पितलको भगवतीको मूर्ति एक वटा, पितलको हुक्का एक वटा, खुकुरी दुई वटा र ११ हजार रुपैयाँ नगद चोरी गरेका थिए।
उनीहरूले टिनको बाकस फोडेर चार आनाको सुनको तिलहरी र सुनको नाकमा लगाउने झुम्का पनि चोरी गरेको डिएसपी रायले जानकारी दिए।
त्यसैगरी राजेन्द्रको घरको ढोका फोडेर तामाको ताउला तीन वटा, तामाको गाग्री तीन वटा, पितलको बाँटा तीन वटा, तामाको बाँटा चार वटा र तामाको लोटा तीन वटा चोरी गरेको पाइएको प्रहरीले जनाएको छ।
प्रहरीले चारै जनालाई आइतबार पक्राउ गरेको हो। पक्राउ परेका नगर कार्यपालिका सदस्यसहित चारै जनालाई चोरी अभियोगमा मुद्दा चलाउन सोमबार जिल्ला अदालतबाट म्याद थप गर्ने तयारी भइरहेको डिएसपी रायले बताए।
यसमा मूल तथ्य, आरोपको प्रकृति र डिएसपीको भनाइ जस्ताको तस्तै राखेर दोहोरिएका अंश हटाइएको छ र घटनाक्रमअनुसार फ्लो मिलाइएको छ।
-1790575819.png)
-1788334994.jpg)
