पृथ्वी राजमार्गअन्तर्गत धादिङको गलौंदीमा सडक भासिएपछि राजमार्ग अवरूद्ध छ।
गजुरी गाउँपालिका-५ गलौंदीमा शुक्रबार सडक भासिएपछि हिजोदेखि नै सवारी आवागमन ठप्प छ।
सडक अवरुद्ध भएपछि काठमाडौंबाट बाहिरिने मालवाहक सवारीसाधनलाई कलंकी क्षेत्रमा होल्ड गरिएको छ।
सडक बन्द हुँदा मालवाहक सवारीसाधनको आवागमन प्रभावित भएको छ।
अरू यात्रुवाहक बसहरू काठमाडौंबाट हेटौंडा जोड्ने त्रिभुवन राजपथबाट सञ्चालन भइरहेका छन्।
उक्त सडकमा पनि अहिले समय तोकेर आलो-पालो गरी सवारी साधन सञ्चालन गराइएको छ।
शनिबार बिहान २ बजेदेखि ५ बजेसम्म हेटौंडाबाट काठमाडौं आउने सवारी साधन सञ्चालन गराइएको थियो। शुक्रबार साँझ ६ बजेदेखि राति ११ बजेसम्म काठमाडौंबाट हेटौंडा जाने सवारी साधन चल्न दिइएको थियो।
त्रिभुवन राजपथमा ११ मिटर लम्बाइसम्मका यात्रुवाहक सवारीसाधनलाई मात्र सञ्चालन अनुमति दिइएका कारण ठूला सवारी साधन कलंकीमै होल्ड भएका हुन्।
धादिङकी प्रमुख जिल्ला अधिकारी लक्ष्मी पाण्डेयका अनुसार शनिबार बिहानैदेखि वैकल्पिक सडक खोल्नेगरी काम भइरहेको छ।
'भासिएको सडककै माथिबाट वैकल्पिक बाटो बन्दैछ। अहिले सफा गरिँदैछ। एक डेढ घन्टामा साना गाडीहरू चल्छन्,' उनले भनिन्।
ठूला गाडीहरू सञ्चालन हुने गरी बाटो मर्मतका लागि भने केही समय लाग्ने उनले बताइन्।
'भरे साँझसम्म ठूलो गाडी पनि चल्न सक्छन्,' उनले भनिन्।
राजमार्गको अरू खण्डमा भने समस्या नरहेको प्रजिअ पाण्डेयले जानकारी दिइन्।
हेर्नुस् कलंकीमा ठूला गाडीको लाइन—
.JPG)
