सशस्त्र प्रहरी परिवार महिला संघले भोटेकोशी बाढी प्राभावित सशस्त्र प्रहरी कर्मचारी तथा उनीहरूका आश्रित परिवार र अवकाशप्राप्त सशस्त्र प्रहरी कर्मचारीलाई राहत रकम हस्तान्तरण गरेको छ।
उक्त रकम सशस्त्र प्रहरी बल नेपाल प्रधान कार्यालयमा सोमबार संघकी अध्यक्ष श्रीमती सावित्रा कुमारी पौडेलले हस्तान्तरण गरेका हुन्।
उक्त बाढीमा बहालवाला सशस्त्र प्रहरी कर्मचारी १३ जना र अवकाशप्राप्त सशस्त्र प्रहरी १ जना गरी १४ जना बेपत्ता भएका थिए।
१ जना अवकाशप्राप्त सशस्त्र प्रहरी कर्मचारी घाईते भएका थिए।
त्यस्तै दुई जना सशस्त्र प्रहरी कर्मचारीहरूको परिवार बेपत्ता भएका छन्। बेपत्ता बहालवाला तथा अवकाशप्राप्त सशस्त्र प्रहरी कर्मचारीका परिवारलाई २५ हजार दरले तथा परिवार बेपत्ता भएका सशस्त्र प्रहरी कर्मचारीलाई १० हजार दरले र घाईते भएका अवकाशप्राप्त सशस्त्र प्रहरी कर्मचारीलाई समेत १० हजार रुपैयाँ उपलब्ध गराइएको छ।
संघकी अध्यक्ष श्रीमती सावित्राकुमारी पौडेलले बेपत्ता भएकामध्ये सशस्त्र प्रहरी सहायक हवल्दार कृष्णकुमार कार्की, आशिष पौडेल र जवान साजन कुँवरको परिवार तथा अवकाश प्राप्त सशस्त्र प्रहरी सहायक निरीक्षक बलबहादुर घर्ती मगर र परिवार बेपत्ता भएका २ महिला सशस्त्र प्रहरी कर्मचारीलाई उक्त रकम हस्तान्तरण गरेका हुन्।
बेपत्ता भएका बाँकी सशस्त्र प्रहरी कर्मचारीहरुको परिवारजनहरुसँग भेट गरी उक्त रकम प्रदान गरिने छ।
त्यस्तै उनले सशस्त्र प्रहरी बल नेपाल प्रधान कार्यालयमा रहेको विपद् कोषमा जम्मा गर्नको लागि ५० हजार ५ सय ५५ रुपैयाँ सशस्त्र प्रहरी अतिरिक्त महानिरीक्षक अन्जनीकुमार पोखरेललाई हस्तान्तरण गरेका हुन्।
सशस्त्र प्रहरी परिवार महिला संघलाई आत्मनिर्भर बनाउँदै लैजाने क्रममा संघले विभिन्न किसिमका आयमूलक क्रियाकलापहरू सञ्चालन गर्दै आइरहेको छ। उक्त आयमूलक क्रियाकलापहरूद्वारा संकलित रकमबाट नै राहत रकम प्रदान गरिएको हो।
