फिफा विश्वकप २०२२ र एएफसी एसियन कप २०१३ को छनोट प्रतियोगिताअन्तर्गत चाइनिज ताइपेईविरुद्ध नेपालले २–० को अग्रता लिएको छ।
नेपालका लागि दुवै गोल अन्जन विष्टले गरेका छन्। अन्जनले खेलको चौथो मिनेट र ६२ मिनेटमा गोल गरे।
उनले चौथो मिनेटमा फ्रिकिकमा आएको पासमा हेडमार्फत गोल गरेका थिए। दोस्रो गोल डिबक्सभित्रको देब्रेतिरबाट गरेका थिए।
आफ्नो पहिलो खेलमा कुवेतविरुद्ध ७–० को हार बेहोरेको नेपालले जित हात पारे ठूलो राहत मिल्नेछ।
गत बिहीबार कुवेत सिटीमा पीडादायी हार आत्मसाथ गरेको नेपालले मंगलबार चाइनिज ताइपेईसँग उसकै घरेलु मैदानमा खेलिरहेको छ।
यो पनि : नेपालको ८ वर्ष यताकै खराब प्रदर्शन
नेपाल र चाइनिज ताइपेईबीच पछिल्लो पटक गत जेठमा मैत्रीपूर्ण खेल भएको थियो। सो खेलमा नेपालले ताइपेईलाई उसैको घरेलु मैदानमा १-१ गोलको बराबरीमा रोकेको थियो।
ताइपेईले पनि छनोटको पहिलो खेलमा हार बेहोरेको थियो। ताइपेईलाई एसियाको बलियो राष्ट्र जोर्डनले २-१ ले पराजित गरेको थियो। त्यसैले दोस्रो खेलमा जित निकालेर अंक जोड्न ताइपेईमाथि दबाब छ।
समूह बीमा रहेको नेपालले पहिलो चरणको बाँकी २ खेल एक महिनापछि खेल्नेछ। नेपालले अस्ट्रेलियासँग क्यानबेरामा असोज २३ र असोज २८ मा जोर्डनविरुद्ध खेल्नेछ।
