म्यानचेस्टर सिटीका मिडफिल्डर इल्के गुन्डोआनले इंग्लिस प्रिमियर लिगको उपाधि लिभरपुललाई दिँदा न्यायसंगत हुने बताएका छन्।
आगामी अप्रिल ३० सम्मका लागि प्रिमियर लिग कोरोनाभाइरसका कारण स्थगित छ। त्यसपछि पनि लिग सुचारु हुने सम्भावना कम छ।
यो अवस्थामा २५ अंकले अग्रता लिइएको शीर्ष स्थानको लिभरपुललाई उपाधि दिनु ठिक हुने जर्मन मिडफिल्डर गुन्डोआनले बताएका हुन्।
लिभरपुल ३० वर्षपछि लिगको उपाधि जित्न २ जितबाट टाढा छ।
'स्पोर्ट्सपर्सन हुँदा तपाई फेयर हुनुपर्छ,' २९ वर्षीय गुन्डोआनले भने।
यसअघि युइएफएले जुन अन्त्यसम्म पनि लिग नसकिए पूर्ण नतिजा नआउने बताएको थियो।
२९औं चरणको खेल जारी रहँदा लिगका खेलका प्रभावित भएका थिए।
लिगमा शीर्ष स्थानको लिभरपुलको २९ खेलबाट ८२ अंक छ। दोस्रो स्थानको म्यानचेस्टर सिटीभन्दा २५ अंकले अघि रहेको लिभरपुल ३० वर्षपछि पहिलो पटक लिग जित्ने संघारमा छ। तर कोरोनाले लिग नै रद्द भएको अवस्थामा उपाधि दिने कि नदिने विषयमा स्पष्ट छैन।
लिगको विषयमा निर्णय गर्ने अधिकार प्रिमियर लिगको बैठकमा छ।
बैठकमा दुई तिहाई मतको आधारमा निर्णय हुनेछ। यसको अर्थ २० मध्ये १४ क्लबले गर्ने निर्णय नै अन्तिम हुनेछ। लिग रद्द भएको अवस्थामा अंक तालिकाको शीर्ष स्थानमा रहेको लिभरपुलले उपाधि जित्नका लागि कम्तिमा १४ क्लबले उसको समर्थन गर्नु पर्नेछ।
प्रकाशित मिति: सोमबार, चैत १७, २०७६, ११:३०:००
