यो समय नेपाली समाजलाई दशैंले पुरै ढाकेको छ। नवदुर्गा पूजाको मध्यमा रहेका हामी नेपालीको घरघरमामा दशैं आएको छ।
टोलटोलमा धेरै वर्षपछि भेटघाट भएको साथीसंगीले आ-आफ्नै तरिकाले ठूला ठूला कुरा गर्दैछन्। विदेशिएका सदस्य पनि पारिवारिक मिलनमा रमाइरहेका छन्। मनमा जे भए पनि धेरै नेपालीको घरमा अहिले हाँसो खुसी उमंग देख्न सकिन्छ।
तर किन किन बाहिर जति नै रमझम देखे पनि यो मन रमाउन सकिरहेको छैन। जब साना साना नानीहरू घरको आँगनीमा मिलेर खेलिरहेको देख्छु तब निर्मला, श्रेया अनि सम्झनाजस्ता हिंशाले बाच्न नपाएका छोरीलाई सम्झेर स्तब्ध हुन्छु। आँखाबाट आँशु बररर झर्छ र सोचमग्न हुन्छु, कहिले होला नेपाली समाज हिंसारहित हुने।
लाग्छ हाम्रो बाल्यकालमा बरू यति सारो हिंसा छोरीहरूले सहन परेको थिएन। त्यस बेलाको समाजमा छोरीलाई पूजा गरिन्थ्यो, सबैभन्दा पहिले टिका लगाइन्थ्यो, उनीहरुको खुट्टा ढोगिन्थ्यो र छोरीलाई घरको लक्ष्मीको रूपमा लिइथ्यो अनि घर समाजकै इज्जतको रुपमा हरेक छोरीचेलीलाई पुरै समाजले नै संरक्षण दिन्थ्यो। र त्यसै अनुरुप व्यवहार पनि गरिथ्यो। तर आज यी नादान लक्ष्मीमाथि हरेक पल पापी नजरले छेडिरहेको भान हुन्छ।
आज भोलि प्रकाशित हुने हरेक प्रत्रपत्रिकामा बलात्कार, हत्या, महिला हिंसाका समचारहरू छ्यापछ्यापति पढ्न पाइन्छ। आजकै ताजा समाचार पनि धनुषामा नवदुर्गाको पूजा हेर्न गएकि १० वर्षे बालिकाको बलत्कार पछि हत्या भएको कुरा सार्वजनिक भएको छ।
माता दुर्गारूपी किशोरिहरुको संरक्षण अब कसले गर्ने? के अहिलेका परिवर्तित समाजले बलत्कार हत्या हिंसाबाहेक अरु केही उपलब्धी गर्न सकेको छैन?
धेरै ढिला भइसकेको छ। दिनानुदिन हिंसाले गर्दा सयौं छोरीले अकालमा मृत्युवरण गरिरहेका छन्। यो दोष कुनै एक जना पुरुषको मात्रै होइन, यस्ता कार्यको दोषि अब पुरै समाज हो।
हामीले आफ्नो घर र समाज निर्माण कसरी गरिरहेका छौं भन्ने छौं भन्ने तिर सोचेर हरेक घरमा छोरीको इज्जत, सम्मान र संरक्षणको बारेमा कुरा हुन जरूरी रहेको छ। प्रत्येक आमाले आफ्ना छोराहरुलाई छोरी तथा दिदीवहिनीहरुको महत्व बुझाउन अति आवश्यक छ।
यदि हिंसाले गर्दा केही घटना भईहाले पनि सबै मिलेर पीडितलाई न्याय दिलाउन सोच्ने बेला आएको छ। यो देशमा कानुनले कानमा बुझो लगाएर बसेको भान आम जनातालाई परिरहेको कुरा नकार्न सकिँदैन। हिंसा बलात्कार र हत्याको श्रृंखलामा पनि दोषिहरू सजिलै उम्कनुले पनि हाम्रो देशलाई अहिले न्याय हराएको देश भनेर भन्न सकिन्छ।
नेपालीको महान् चाड दशैंको रौनकमा पनि धेरै घरका लक्ष्मीहरुको हिंसा पश्चातको मृत्युले न्याय नपाएर, त्यस विरुद आवाज उठाउनेहरु अन्यौलता हामीले जताततै देख्न सक्छौं।
अब हामी देश र देशको कानुनको भर परेर मात्रै हुँदैन, यदि कानुनको मात्रै भर पर्न थालियो भने भोलि घरघरमा लक्ष्मीहरुको अभाव पर्नेछ त्यसैले यही दशैंको आर्शिवादको रुपमा हरेक घरका अग्रजहरुले आफ्ना सन्ततीलाई कुनै पनि हिंसा विरुद्धको आवाज उठाउ भनेर दिऊ। घरको छोराहरुलाई टिका र जमरा पश्चात आर्शिवादको रुपमा सुख, समृद्धि छाओस् भनेर होइन बलत्कारी नहुनु, र बलत्कार र हिंसा विरुद्धको आवाजलाई वुलन्द्ध पार्नू भनेर दिँऊ अनि केही हुन्छ कि?
अहिलेको हिंस्रक र मानवताविहिन समाजलाई सभ्य र सुरक्षित बनाउन हामीले आफ्ना आर्शिवचनहरु परिवर्तन गर्नैपर्छ।
