सम्पादकीय नोट: हामीले केटाकेटीहरूका लेख शृंखला सुरू गरेका छौं। आफ्ना नानीबाबुले नेपाली भाषामा लेखेका अनुभव, कथा, कविता, निबन्ध लगायत सिर्जनात्मक रचना तल दिइएको इमेल ठेगानामा पठाउनुहोस्, हामी प्रकाशित गर्नेछौं।
...
मेरो नाम सुरासु महर्जन हो। म अहिले १२ वर्षको भए। ज्ञानोदय बालबाटिका स्कुल, खोकनामा कक्षा पाँचमा पढ्छु। अहिले रिजल्ट पर्खिबसेको छु। रिजल्ट पछि ६ कक्षामा जानेछु।
अहिले म दिनभरजसो घरमै हुन्छु। कारोना भाइरसको कारण घरबाहिर निस्कनु हुँदैन। गएको चैत ११ गते एक हप्ताका लागि लकडाउन गरिएको थियो। अहिले त करिब महिनाका लागि भइसकेको छ। कोरोना भाइरस सबभन्दा पहिले गएको ३१ डिसेम्बरमा चीनको वुहानमा देखिएको हो।
आजसम्म विश्वभर १६ लाखभन्दा बढीलाई भाइरसको संक्रमण भइसक्यो। ९५ हजार बढीको ज्यान गइसकेको छ। त्यस्तै, ३ लाख ५५ हजार बढी निको भइसकेका छन्। मैले यो डाटा/सूचना www.worldometer.info बाट लिएको हो। यो वेबसाइटबाट कोरोनासम्बन्धी विश्वभरको लाइभ डाटा/सूचना पाउन सकिन्छ। लकडाउनका बेला मैले जानकारी पाएको यो एउटा नयाँ वेबसाइट हो। यो वेबसाइटबारे मैले बुवाबाट थाहा पाएको हुँ।
केही दिनअघि यो वेबसाइट हेर्दा विश्वभर १२ लाख ३ हजारलाई कोरोना देखिएको थियो भने ६४ हजारको मृत्यु भएको थियो। यो डाटाले कोरोना भाइरस कति डरलाग्दो छ भन्ने देखाउँछ। त्यसैले, हामी लकडाउनका बेला बाहिर जानु हुँदैन। कोरोना भाइरसबाट बचेर बस्नुपर्छ।
यो वेबसाइटबाट हामीले विश्वका अन्य डाटा/जानकारी पनि पाउन सक्छौं। वेबसाइटमा पृथ्वीको जनसंख्या कति भयो, एक सेकेन्डभित्र विश्वमा कति बच्चा जन्मिए, कति जनाको मृत्यु भयो भन्ने लाइभ डाटा हेर्न सकिन्छ।
लकडाउनका बेला हाम्रो पृथ्वी नजिक आउन लागेको एउटा एस्ट्रोइडका बारेमा पनि अलिकति जानकारी पाएको छु। यो एस्ट्रोइडलाई ‘१९९८ ओआर २’ नाम दिइएको छ। यो एस्ट्रोइड करिब ४ किलोमिटर व्यासमा फैलिएको छ। यो एस्ट्रोइडबारे मैले www.space.com बाट थाहा पाएको हुँ। गुगलमा खोज्दा यो वेबसाइट फेला पारेको हो। यो वेबसाइटअनुसार अमेरिकाको खगोल सम्बन्धी अनुसन्धान गर्ने संगठन नासाले यसबारे अध्ययन गरिराखेको छ।
यो एस्ट्रोइड सन् १९९८ मा पत्ता लागेको हो। यो एस्ट्रोइड आउने अप्रिल २९ तारिख २०२० मा पृथ्वीको सबभन्दा नजिक भएर जाने छ। पृथ्वीबाट नजिक भए पनि पृथ्वीबाट करिब ६.५ मिलियन किलोमिटर टाढा हुनेछ। यो भनेको हाम्रो पृथ्वी र चन्द्रमा बीचको दूरी भन्दा १६ गुणा टाढा हो। त्यसैले यसबाट हाम्रो पृथ्वीलाई केही खतरा छैन।
यो लकडाउनको सदुपयोग गर्दै मैले मेरी आमाबाट खाना पकाउनेबारे पनि केही ज्ञान सिकेको छु। अझै धेरै सिक्न बाँकी छ। चाउचाउ बनाउन र अमलेट बनाउन त आउँछ। अब अरु पनि मिठो–मिठो पकाउन सिक्नेछु। इन्डक्सन चुलोले गर्दा पकाउन सजिलो भएको छ। यसमा खतरा पनि हुँदैन।
लेख पठाउने इमेल: (नेपालीमा लेखिएका लेख मात्र प्रकाशन हुनेछन्)
ketaketi.setopati@gmail.com