जनता समाजवादी पार्टी (जसपा) मा टिकट वितरणमा भएको विवादले नेता–कार्यकर्ताबीच हातपात भएको छ।
आइतबार बिहान जनकपुरधामस्थित राजदरबार होटलमा बसेको बैठकमा टिकट वितरणको विषयमा विवाद कुटाकुट भएको हो।
गणेशमान चारनाथ नगरपालिकाका निर्वतमान मेयर रामबाबु यादवलाई टिकट नदिने बताइएपछि उनका समर्थक र टिकट वितरण गर्ने नेताहरुबीच विवाद भएको थियो।
कुटपिटबाट जसपा नेपालका केन्द्रीय कार्यकारिणी सदस्य गजाधर रोहिता यादव, जसपानिकट विद्यार्थीका प्रदेश उपाध्यक्ष विकास यादवसहित चारजना नेता कार्यकर्ता समान्य घाइते भएको बैठकमा सहभागी एक नेताले बताए।
‘राबाबुजीको टिकट काट्ने भएपछि उहाँका कार्यकर्ता आक्रोशित हुँदै आएका थिए। भनाभनपछि कुटपिट नै भयो,’ ती नेताले भने।
कुटपिट स्थलबाट केहीबेर अघि नै मधेश भौतिक पुर्वाधारमन्त्री रेणु यादव, प्रदेशका आर्थिक मामिला तथा योजनामन्त्री शैलेन्द्र साह लगायतका नेताहरु बाहिरएका थिए।
प्रदेशका पालिकाहरुका लागि उम्मेदवार टुंगो लगाउन राजदरबार होटेलमा मधेश प्रदेशका अध्यक्ष रामबाबु कुमार यादव र गजाधर रोहिता यादव लगायतका शीर्ष नेताहरुको उपस्थित छन्।
आकांक्षीहरुले टिकटका लागि नेतृत्वसामु दबाब दिइरहेका छन्।
