९० मिनेट सकिएर इन्जुरी पुगेको खेलमा कोलम्बियाले इङ्ल्याण्डलाई बराबरी गोल फर्काउँदै खेलमा फर्किएको छ।
कोलम्बियाले खेलको ९३ औं मिनेटमा समय सकिन मात्र एक मिनेट बाँकी छँदा गोल गर्दै लगभग इङ्ल्याण्डको पक्षमा गइसकेको खेलमा रोचक पुनरागमन गर्न सफल भएको छ। कोलम्बियाका लागि सो गोल एरी. मिनाले गरेका हुन्।
उनको यो अन्तिम मिनेटको गोलले कोलम्बियाको क्वाटरफाइनल सपनालाई अन्तिम अवस्थामा फेरि जीवित पारिदिएको छ। अब दुबै टोलीले ३० मिनेटको अतिरिक्त खेल खेल्नेछन्। यस समयमा पनि नतिजाको टुङ्गो नलागेमा क्वाटरफाइनलमा पुग्ने टोलीको घोषणा टाइब्रेकरमार्फत हुनेछ।
यो गोलसँगै मिनाले एकै विश्वकपमा सर्वाधिक गोल गर्ने डिफेन्डरको कीर्तिमानसँग बराबरीसमेत गरेका छन्। उनले सन् १९७४ मा गर्मनीका पल ब्रेटनरको कीर्तिमानसँग बराबरी गरेका हुन्। यस विश्वकपमा यो उनको तेश्रो गोल हो। तीनै गोल उनले हेडमार्फत गरेका हुन्।
आफ्नो स्टार खेलाडी रोड्रिगेजबिनै मैदानमा उत्रिएको कोल्म्बिया खेलको ५७ औं मिनेटमा पेनाल्टीमार्फत भएको गोलबाट पछाडी परेको थियो।
