भरतपुर महानगरपालिका र अस्ट्रेलियाको मेलवर्नस्थित मेरिबेक सिटी काउन्सिलबीच भगिनी सम्बन्ध स्थापना गर्ने भएको छ।
मेरिबेक काउन्सिल कार्यालयमा आगामी मे १४ मा औपचारिक भगिनी सम्बन्ध स्थापना हुन लागेको हो।
मेरिबेक सिटी काउन्सिलरको हालै बसेको बोर्ड बैठकले यी दुई नगरबीच भगिनी सम्बन्ध स्थापना गर्ने निर्णय गरेसँगै अस्ट्रेलियाको कुनै पनि सहरसँग भगिनी सम्बन्ध राख्ने भरतपुर पहिलो महानगर बन्ने भएको छ।
आगामी जुनमा भरतपुर महानगरकी मेयर रेनु दाहाल र मेरिबेक सिटी काउन्सिलकी मेयर हेलेन डेभिडसनबीच औपचारिक भेटघाट तय गरिएको छ।
भेटअघि यी दुबै नगरबीच गर्न सकिने सहकार्य, सांस्कृतिक आदानप्रदानको खाका तयार गरिनेछ।
मेरिबेक सिटी काउन्सिलका मेयर हेलेन डेभिडसन, काउन्सिलरहरू तथा बोर्ड सदस्यहरूले काउन्सिलर क्रिस माईल्सद्वारा प्रस्तुत प्रस्तावलाई सर्वसम्मतले अनुमोदन गरेका थिए।
यस सहमतिसँगै भरतपुर महानगरपालिकासँग औपचारिक सहकार्यको बाटो खुलेको छ।
दुबै स्थानीय निकायबाट आवश्यक प्रारम्भिक तयारीहरू सम्पन्न गरेपछि, औपचारिक बैठकहरूका लागि पत्राचार तथा समन्वयको प्रक्रिया अगाडि बढाइनेछ। उक्त प्रक्रियामा वाणिज्यदूत कार्यालयले दुबै काउन्सिलहरू समन्वय गर्दै सहजीकरणको भूमिका निर्वाह गर्नेछ।
भिक्टोरियाका अवैतनिक वाणिज्यदूत निराजन गौलीले उक्त सम्झौतालाई ऐतिहासिक उपलब्धिको रूपमा मूल्याङ्कन गर्दै गहिरो कृतज्ञता र उत्साह व्यक्त गरे।
‘यो सम्पूर्ण नेपाली समुदायका लागि गर्व र प्रेरणाको क्षण, ऐतिहासिक उपलब्धि हो। हाम्रो लामो मेहनत, कूटनीतिक पहल र साझा उद्देश्यको परिणामस्वरूप अस्ट्रेलियामा पहिलोपटक नेपालसँग भगिनी सम्बन्ध स्थापना हुन लागेको हो,' गौलीले सेतोपाटीसँग भने, 'यो केवल सुरूआत हो, अब हामीसँग अझ धेरै सम्भावनाहरू छन्। बधाई छ सम्पूर्ण नेपाली समुदायलाई।'
यो सहकार्यले दुई सहरबीच शैक्षिक, सांस्कृतिक, प्रशासनिक तथा विकास परियोजनाहरूमा सहयोगको ढोका खोल्ने विश्वास गरिएको छ। नेपाली र अष्ट्रेलियाली समुदायबीच मित्रता, समझदारी र आपसी सम्मानलाई मजबुत पार्दै, यो भगिनी सम्बन्धले भविष्यमा बहुआयामिक साझेदारीको आधार तय गर्नेछ।
‘यो सम्बन्ध केवल औपचारिकता मात्र नभई दुई समुदायबीचको सांस्कृतिक आदानप्रदान, सामाजिक एकता, शिक्षा, पर्यटन तथा स्थानीय प्रशासनिक अभ्यासहरूको आदानप्रदानमार्फत दीर्घकालीन सहकार्य र साझेदारी निर्माण गर्ने प्रयास हो,’ वाणिज्यदूत गौलीले भने, ‘मेरिबेक क्षेत्र, विशेषगरी ग्लेनरोय क्षेत्रमा उल्लेख्य नेपाली जनसंख्या रहेको तथ्यले यो सम्बन्धलाई थप अर्थपूर्ण बनाएको छ। नेपाली समुदायको सक्रिय सहभागिता र योगदानको सम्मानस्वरूप नगरस्तरमा यस्तो सम्बन्ध स्थापनाले सम्पूर्ण प्रवासी नेपालीहरूलाई थप प्रेरणा दिनेछ।’
