गैरआवासीय नेपाली संघ (एनआरएनए) का उपाध्यक्ष डा. हेम राज शर्माले संघको आगामी अक्टोबरमा हुने १२औं महाधिवेशनमा अध्यक्ष पदमा आफ्नो स्वाभाविक दाबी रहने बताएका छन्।
तर सबै पक्षलाई समेट्ने बृहत् एकताको लागि जहाँ आवश्यक हुन्छ, त्याग गर्न पनि आफू तयार रहेको उनले स्पष्ट पारेका छन्।
आयरल्याण्डमा आयोजित गैरआवासीय नेपाली संघ राष्ट्रिय समन्वय परिषद (एनसीसी) को महाधिवेशनलाई मंगलबार सम्बोधन गर्दै डा. शर्माले अध्यक्ष पदको लागि आफ्नो दाबी स्वाभाविक भएको बताए।
‘वर्तमान अध्यक्ष डा. बद्री केसीपछि बरिष्ठ उपाध्यक्षको हैसियतले मेरो अध्यक्ष पदको दाबी स्वाभाविक हो। मैले सिनियर उपाध्यक्षको नाताले नेतृत्व लिने कुरा हो,’उनले भने, 'तर संस्थाभित्र सबैलाई अटाउने एकता बनाउन जहाँ के सम्बोधन गर्नुपर्छ, त्यसका लागि म पछि हट्दिनँ।’
शर्माले संघको १२औं महाधिवेशन सबै पक्षलाई अटाउने एकताको अधिवेशन बनाउनुपर्नेमा जोड दिए।
‘महेशजीसँग हामी दिनहुँ छलफलमा छौं। हामी एकताको लागि लचक छौं। तर पहिला एनसीसी संरचना खडा गरौं, सदस्यता बढाऔं,’उनले भने, 'एनसीसीको निर्वाचन भनेको संस्थाको खम्बा तयार गर्नु हो। त्यसपछि मात्रै एकताको छानो लगाउने काम गर्न सक्छौं।’
संघको निर्वाचनमा हुने करोडौं रुपैयाँको खर्च र त्यसबाट उत्पन्न हुने विकृतिप्रति गम्भीर चिन्ता व्यक्त गर्दै डा. शर्माले आइसीसी अध्यक्ष बन्न करोडौं रुपैयाँ खर्च गर्ने प्रवृत्ति अन्त्य हुनुपर्ने बताए।
उनले भने, 'म अध्यक्षको उम्मेदवारी शुल्क बाहेक अन्य कुनै खर्च गर्नेवाला छैन। संस्थाको नेतृत्वमा पैसा हुने र नहुने सबैले पुग्न सक्ने वातावरण चाहिन्छ। नेताको ढोकाढोका धाउने प्रवृत्ति गलत हो।'
उनले एनसीसी निर्वाचनदेखि नै पैसाको चलखेल हुने प्रवृत्ति हटाउनुपर्ने बताए।
एनआरएनएका सबै एजेन्डा राजनीतिक प्रकृतिका हुने भए पनि चुनाव जित्नका लागि दलको राजनीति गर्नु उचित नभएको उनले बताए।
उनले भने, 'हामी आफ्ना एजेन्डा लिएर राजनीतिक दलहरूसँग छलफल गर्न सक्छौं। तर सामाजिक संस्थामा चुनाव जितेर आएपछि पार्टी राजनीति गर्नु हुँदैन भन्ने हाम्रो मान्यता हो।'
कार्यक्रममा एनआरएनएका सचिव भिमकमल केसीले पनि बृहत् एकताको लागि आवश्यक गृहकार्य भइरहेको बताए। उनले एनआरएनए सम्भावनाले भरिएको संस्था भएको उल्लेख गर्दै सबैलाई एउटै छानामुनि ल्याउन आपसी समझदारी र सहयोगको अपिल गरे।
-copy-1745411477.jpg)
-1746009348.jpg)
