गैरआवासीय नेपाली संघ(एनआरएनए) अध्यक्ष डा.हेमराज शर्माले एक पटकको नेपाली सधैँको नेपाली भन्ने भावनालाई व्यवहारमा रूपान्तरण गर्ने विषयमा अपेक्षा अनुसार प्रगति हुन नसकेको बताएका छन्।
गैरआवासीय नेपाली दिवसका अवसरमा उनले यस्तो बताएका हुन्।
'नेपालीका लागि नेपाली' मुल नाराका साथ सन् २००३ मा गैरआवासीय नेपाली अभियान सुरू भएको थियो।
'आफ्नो स्थापनाको २३औं वर्षगाँठ मनाइरहँदा ९० भन्दा बढी देशमा सञ्जाल विस्तार गरी विभिन्न मुलुकमा छरिएर रहेका नेपाली समुदायलाई एकबद्ध गर्न संघ सफल भएको छ। विभिन्न मुलुकमा छरिएर रहेका नेपालीहरूलाई एकताबद्ध गर्दै विदेशमा आर्जन गरेको ज्ञान, सीप, प्रविधि र पुँजीलाई मातृभूमि नेपालको सामाजिक तथा आर्थिक विकासमा सदुपयोग गर्ने उद्देश्यका साथ स्थापना भएको गैरआवासीय नेपाली संघ हाम्रा अग्रजहरूको अथक प्रयास र समर्पणले स्वदेश तथा विदेशमा बस्ने नेपालीहरूको आशा र भरोसाको केन्द्र बनेको छ,' उनले भनेका छन्।
तर स्थपाना कालदेखि नै उठाइएको एक पटकको नेपाली, सधैँको नेपाली भन्ने भावनालाई व्यवहारमा रूपान्तरण गर्ने विषयमा अपेक्षा अनुसार प्रगति हुन नसकेको उनको गुनासो छ।
संविधानले सुनिश्चित गरेको गैरआवासीय नेपाली नागरिकताको पूर्ण कार्यान्वयन र वंशजको नागरिकताको निरन्तरताका लागि संघले प्रतिबद्धताका साथ पैरवी गर्दै आएको पनि उनले उल्लेख गरेका छन्।
नेपालको जलविद्युत, बैंकिङ, पर्यटन, स्वास्थ्य, शिक्षालगायतका क्षेत्रमा गैरआवासीय नेपालीहरूको लगानी प्रशंसनीय रहेको उनको भनाइ छ।
'लामो समयदेखिको पैरवीबाट भर्खरै १० अर्ब रूपैयाँको एनआरएनए डेभलपमेन्ट फन्डमार्फत विदेशमा रहेका ठूला लगानीकर्ता मात्र नभई वैदेशिक रोजगारीमा रहेका नेपालीहरू तथा साना र मझौला लगानीकर्ताहरूलाई पनि देशमा लगानी भित्र्याउने बाटो खुलेको छ। यद्यपि नागरिकताको विषय सम्बोधन नहुँदा गैरआवासीय नेपालीहरूमा लगानी भित्र्याउने आत्मविश्वास बढ्न सकेको छैन,' उनले भनेका छन्।
आर्थिक लगानी मात्र नभई बौद्धिक लगानी, अनुसन्धान, नवप्रवर्तन र प्रविधि हस्तान्तरणलाई पनि प्रोत्साहन गर्न संस्थागत प्रयास जारी रहेको अध्यक्ष डा.शर्माले बताए।
