जोएसबुर्ग एमजी मोटर इन्डिया र नेपालको आधिकारिक वितरक जि.ओ. अटोमोबाइल्स प्रा.लि. (गोल्छा अर्गनाइजेसन) ले नेपालमा नयाँ विद्युतीय सवारी एमजी कम्युट इभी सार्वजनिक गरेका छन्।
कम्पनीले यसलाई 'स्वर्णिम अवसर' को अवधारणासहित नेपाली बजारमा ल्याएको जनाएको छ।
सुरुवाती मूल्य ३४ लाख ११ हजार रूपैयाँ निर्धारण गरिएको यो १०० किलोवाट क्षमताको ठूलो क्रसओभर युटिलिटी भेहिकल (सियुभी) परिवार, होटल, रिसोर्ट, ट्राभल सेवा तथा कर्पोरेट फ्लिटका लागि उपयुक्त हुने कम्पनीको दाबी छ।
जि.ओ. अटोमोबाइल्स प्रा.लि.का प्रबन्ध निर्देशक आकाश गोल्छाले भने, 'स्वर्णिम अवसर भनेको अहिलेको सन्दर्भमा नेपालका लागि कम्युट इभी नै हो। बजेट संशोधनपछि यो अझ उपयुक्त विकल्प बनेको छ। यो कम मूल्यमा उपलब्ध शक्तिशाली र ठूलो गाडी हो, जसमा अनावश्यक सुविधा थपेर लागत बढाइएको छैन। आराम, पर्याप्त स्थान र समयलाई प्राथमिकता दिने ग्राहकका लागि यो उत्कृष्ट विकल्प हो।'
उनका अनुसार गाडीमा पर्याप्त लेग स्पेस र लगेज, आरामदायी सिट तथा सहज र किफायती स्पेयर पार्ट्स उपलब्ध गराइएको छ।
एमजीको विद्युतीय प्लेटफर्ममा आधारित कम्युट इभीले एकपटकको पूर्ण चार्जमा ३३२ किलोमिटरसम्म यात्रा गर्न सक्ने कम्पनीले जनाएको छ।
यसमा १०० किलोवाटको विद्युतीय मोटर जडान गरिएको छ।
सवारीको भित्री संरचना यात्रु केन्द्रित बनाइएको छ। यसमा १३५ डिग्रीसम्म फुकाउन मिल्ने सिट, बहु-यात्रुलाई सहज बनाउने फ्ल्याट लेआउट तथा ६०८ लिटर क्षमताको फराकिलो लगेज स्पेस उपलब्ध छ।
कम्पनीका अनुसार यो सवारी व्यक्तिगत प्रयोगभन्दा बढी होटल ट्रान्सफर, विमानस्थल पिकअप तथा कर्मचारी आवतजावतलाई लक्षित गरी विकास गरिएको हो।
नेपालको आतिथ्य तथा पर्यटन क्षेत्र विस्तार भइरहेको बेला कम खर्च र यात्रुको सहजतालाई ध्यानमा राखेर यस्तो सवारीको माग बढिरहेको कम्पनीको भनाइ छ। एमजी कम्युट इभीले यात्रुका लागि आरामदायी अनुभव र व्यवसायका लागि शान्त तथा शून्य उत्सर्जनयुक्त विकल्प प्रदान गर्ने कम्पनीले जनाएको छ।
प्रत्येक एमजी कम्युट इभीसँग ३.३ किलोवाटको पोर्टेबल चार्जिङ केबल स्ट्यान्डर्ड रूपमा उपलब्ध हुनेछ।
साथै गाडीमा एन्टि-लक ब्रेक, इलेक्ट्रिक पार्किङ ब्रेक, अटो होल्ड, हिल डिसेन्ट कन्ट्रोल तथा स्पेयर टायरका लागि छुट्टै स्थान समेत समावेश गरिएको छ, जसले नेपालको विविध सडक तथा भौगोलिक अवस्थाका लागि यसलाई उपयुक्त बनाउने कम्पनीले जनाएको छ।
कम्युट इभी सार्वजनिकसँगै एमजी र जि.ओ. अटोमोबाइल्सले व्यक्तिगत सवारीभन्दा बाहिर व्यावसायिक तथा संस्थागत विद्युतीय गतिशीलता क्षेत्रमा आफ्नो उपस्थिति थप विस्तार गरेको बताएको छ।
