२०७८ साल असार २५ बाट कारोबारमा आएको जीवन विकास लघुवित्त वित्तीय संस्थाको सेयर त्यसको केही महिनामै सर्वाधिक उच्च मूल्य ५ हजार ५१६ रूपैयाँसम्म पुग्यो।
पहिलो वर्ष नै उच्च लाभांश बाँड्ने क्षमता देखिएको कारण कम्पनीको सेयर उच्च मूल्यमा कारोबार भइरहेको थियो।
कम्पनीले सेयर सूचीकरणपछिको पहिलो वर्ष नै ७३.६८ प्रतिशत लाभांश दिएको थियो। सो लाभांश समायोजनको कारण कम्पनीको मूल्य एकैपटक तीन हजारको मूल्य रेञ्जमा रह्यो।
कम्पनीले त्यस पछिको वर्ष पनि आकर्षक लाभांश बाँड्न सक्ने देखिएको कारण केही घटबढ भए पनि मूल्य २५ सय बिन्दुको आसपास टिक्न सकेको थियो।
कम्पनीले गत आर्थिक वर्ष २०७८/७९ मा पनि ३७.३६ प्रतिशत लाभांश घोषणा गरेको थियो। राष्ट्र बैंकले उच्च लाभांशमा रोक लगाएपछि पुनः ३३.१५ प्रतिशत लाभांश प्रस्ताव गर्यो।
अहिले पुनः यो दर संशोधन गर्न राष्ट्र बैंकले दबाब दिएको छ। सोही कारण कम्पनीले अब १४.२८ प्रतिशत बोनस सेयर र कर प्रयोजनको लागि ०.७१४ प्रतिशत नगद लाभांश दिने भएको छ।
लाभांशमा तारम्तार संशोधन भएसँगै कम्पनीको मूल्य मूल्यमा पनि गिरावट आएको छ।
अहिले कम्पनी सेयर मूल्य १७ सय छ। कम्पनीले गरेको पछिल्लो लाभांश घोषणाको कारण लगभग २३ करोड रूपैयाँ अर्को पटक बाड्न सक्ने अवस्था बन्न सक्छ।
कम्पनीले सुरूमा ३७.३६ प्रतिशत लाभांश प्रस्ताव गर्दा ३८ करोड रूपैयाँ बराबरको प्रतिफल वितरण गर्न लागेको थियो। अहिले मात्रै १५ करोड ४४ लाख रूपैयाँ लाभांश बापत बाँड्नेछ।
सरसर्ती हेर्दा बचेको २३ करोड रकमबाट अर्को पटक नै कम्पनीले १९ प्रतिशत लाभांश बाँड्न सक्छ।
यही अर्को पटक पनि कम्पनीबाट लगानीकर्ताहरूले राम्रै लाभांश प्राप्त गर्न सक्ने अवस्था छ। त्यसो भए किन कम्पनीको सेयर भाउ घट्दो क्रममा छ?
पछिल्लो समय लुघवित्त कम्पनीका ऋणीहरू समेत विभिन्न आन्दोलनमा छन्। यो क्षेत्रमै नकारात्मक प्रभाव परेहकोले पनि लघुवित्त कम्पनीहरूको मूल्य बढ्न सकेको छैन।
कम्पनीको वित्तीय विवरण केलाउने हो भने कार्य सम्पादन तुलनात्मक रूपमा घटेको छ। कम्पनीको चालु आर्थिक वर्षको दोस्रो त्रैमासमा नाफा ३७ प्रतिशतले घटेको छ। गत वर्षको साउनदेखि पुससम्ममा ४२ करोड आम्दानी गरेको कम्पनीको यसपटक सोही अवधिमा नाफा २६ करोडमा सीमित भएको छ।
कम्पनीको खराब कर्जामा उच्च दरले वृद्धि भएको छ। गत वर्षको यही समयमा ०.७५ प्रतिशत रहेको खराब कर्जा बढेर २.८३ प्रतिशत छ।
कम्पनीले जोखिमवापत राखेको प्रावधान रकम दोब्बरभन्दा धेरैले बढेको छ। चार करोड ३७ लाख रहेको यस्तो प्रावधान रकम बढेर १० करोड रूपैयाँ पुगेको छ।
कम्पनीको आम्दानीको मुख्य स्रोत ब्याज आम्दानी बढे पनि अन्य स्रोत घटेको छ। कम्पनीको वार्षिक प्रतिसेयर आम्दानी एक सय ३८ रूपैयाँमा रहेकामा ५१ रूपैयाँमा सीमित भएको छ।
कम्पनीको सेयरको प्राविधिक विश्लेषणले भने अहिले मूल्य घट्दो प्रवृत्तिमा नै रहेको र यसले केही समय निरन्तरता पाउने देखिन्छ।
