झापाको बिएण्डसी मेडिकल कलेजका सञ्चालक दुर्गा प्रसाईंले कलेजको सम्बन्धन प्रक्रिया अघि बढाउन चिकित्सा शिक्षा आयोग उपाध्यक्ष श्रीकृष्ण गिरीले २० करोड पैसा मागेको आरोप लगाएका छन्।
प्रसाईंले बुधबार बानेश्वरमा पत्रकार सम्मेलन गरी गिरीले आफूलाई द्वारिका होटलमा बोलाएर २० करोड मागेको आरोप लगाएका हुन्।
प्रसाईं बिएण्डसीलाई सम्बन्धन माग्दै निवेदन लिएर मंसिर १५ गते चिकित्सा शिक्षा आयोगमा पुगेका थिए। बिहान ११ बजे आफू पुगेको र गिरीले साँझ द्वारिका होटलमा बोलाएको प्रसाईंको दाबी छ।
‘२०-२० करोड मागेपछि मैले दिन सक्दिनँ भनेको हुँ,’ प्रसाईंले दाबी गरे, ‘२०-५० लाख, एक करोडसम्म त ठिकै थियो।’
प्रसाईंले आफूले सो रकम दिन नसक्ने भनेपछि गिरीले सम्बन्धनको निवेदन नै दर्ता गर्न नमानेको बताए।
‘म आयोगमा कसरी आएँ, मलाई पनि गाह्रो छ भन्नुभयो, मैले कति भनेर सोधें,’ प्रसाईंले सेतोपाटीसँग पनि भने, ‘उहाँले बीस करोड भन्नुभयो, सम्बन्धनमै बीस करोड तिरेर कसैले मेडिकल कलेज चलाउन सक्छ?’
गिरीले घुसको प्रस्ताव गरी सो पूरा नभएपछि बिएण्डसीको सम्बन्धनको निवेदन नै रोकेको दाबी गरे। तपाईंसँग घुस मागेको केही प्रमाण छ? भन्ने प्रश्नमा प्रसाईंले भने, ‘संसारमा घुस मागेको कहीँ प्रमाण हुन्छ र?’
प्रसाईंले गिरी र आफूलाई आमनेसामने राखेर कुरा गराउन चुनौती दिए।
‘घुस मागेको हो हैन गिरी सर र मलाई आमनेसामने राखेर कुरा गरौं न थाहा भइहाल्छ नि,’ उनले चुनौती दिँदै भने।
यता, उपाध्यक्ष गिरीले भने आफूले घुस नमागेको बताए। सेतोपाटीसँग कुरा गर्दै गिरीले आरोप लगाउने व्यक्तिले प्रमाणसाथ बोल्नुपर्ने बताए।
उनले प्रसाईं सम्बन्धनका लागि ठाडो निवेदन लिएर आयोगमा आएको बताए।
‘उहाँ आउनुभएको थियो, कसैले ठाडो निवेदन लिएर आउँदैमा सम्बन्धनको प्रक्रिया थाल्न मिल्दैन,’ उनले भने, ‘चिकित्सा शिक्षा ऐनले तोकेबमोजिमका सबै सक्कल कागजात लिएर आउनुस् भनी निवेदन दर्ता नगरिएको हो।’
प्रसाईं नेकपा अध्यक्ष पुष्पकमल दाहालनिकट मेडिकल व्यवसायी हुन्। गिरी पनि नेकपानिकट नै मानिन्छन्। शिक्षा मन्त्री गिरिराजमणि पोखरेलनिकट गिरीलाई सरकारले आयोग उपाध्यक्ष नियुक्ति गरेको थियो।
पत्रकार सम्मेलनमा प्रसाईंले बिएण्सी मेडिकल कलेजको कुन पक्ष पुगेको छैन र निवेदन दर्ता नगरिएको भन्दै प्रश्न उठाए। ‘नेपालको कुन कानुनको कुन बुँदाले बिएण्डसी मेडिकल कलेजको सम्बन्धन रोक्छ?,’ उनले प्रश्न गरेका छन्, ‘आयोगको कार्यकारी उपाध्यक्षजस्तो व्यक्तिले हचुवाका भरमा बिएण्डसीको प्रक्रिया नै अगाडि बढ्न हुँदैन भन्न पाइन्छ?’
