नेकपा एमाले नेता विन्दा पाण्डेले अध्यक्ष केपी ओली तेस्रो पटक अध्यक्ष नबन्ने बताएकी छन्।
एमालेको ११ औं महाधिवेशन सन्दर्भमा मंगलबार आयोजित अन्तरसंवाद कार्यक्रममा उनले महाधिवेशनको अन्तिम समयमा अध्यक्ष ओलीले नयाँ अनुहार अगाडि सार्ने बताएकी हुन्।
महाधिवेशनको उम्मेदवारी दर्ता गर्ने दिनसम्ममा अध्यक्ष ओलीले आफूले नेतृत्व छाडेको घोषणा गर्नेमा आफू विश्वस्त रहेको उनले बताइन्।
अध्यक्ष ओलीले नेतृत्व छोडेर नयाँ पुस्तालाई नेतृत्व गर्नको लागि सघाउनेमा आफू आशावादी रहेको उनको भनाइ छ।
नेपाली राजनीतिमा पछाडिको नेतृत्वलाई मार्गदर्शन गर्ने परिपाटी अहिलेसम्म नरहेको उल्लेख गर्दै उनले अध्यक्ष ओलीले त्यसको मान्यता स्थापित गर्ने बताइन्।
केपी ओलीकै अगुवाइमा दुई कार्यकाल नेतृत्व र ७० वर्षे उमेरहदको व्यवस्था पार्टीमा आएको स्मरण गर्दै उनले आफूले स्थापित गरेको मान्यताभन्दा बाहिर जान नमिल्ने उल्लेख गरिन्।
उनले केपी ओली बिनाको एमाले कल्पना गर्न सकिँदैन भन्ने खालको नारा स्थापित गर्न खोजिएकोप्रति पनि असन्तुष्टि जनाइन्।
उनले भनिन्, ‘जुन बेला माधव कमरेड पार्टीको शीर्ष नेतृत्वमा हुनुहुन्थ्यो। १५ वर्षसम्म उहाँ त्यहाँ रहँदाखेरीमा पार्टीमा नेतृत्व विकास हुन सकेन, जाम भयो, त्यो जाम खुलाउनको लागि पछिल्लो चरणमा दुई कार्यकाल भएपनि अहिले पहिलो केही अवधिको लागि एक कार्यकालमा पनि अलि छिटो छिटो महाधिवेशन गरेर नेतृत्व परिवर्तन गर्नुपर्छ भन्ने मान्यतालाई स्थापित गर्ने हाम्रो अध्यक्ष केपी ओली आज आफू शीर्ष तहमा पुगेपछि आजीवन त्यो पदमा रहिरहनुपर्छ भन्ने खालको स्थिति सोच्नु एकदमै उहाँको आफैले स्थापित गरेको मूल्य र मान्यता भन्दा गलत कुरा हो। मलाई लाग्छ, २२ गतेसम्मको स्थितिमा उहाँको एउटा मनस्थिति थियो। तर अहिले परिवर्तित स्थितिमा सायद फेरि एकपल्ट आफैले स्थापना गरेको मूल्य र मान्यतालाई कम्तीमा पनि मैले बिदा लिँदै गर्दाखेरीमा त्यसलाई स्थापित गरेर जानुपर्छ भन्ने मनस्तिथिमा उहाँ पुग्नुहुनेछ।’
उनले अगाडि भने, ‘अझै पनि ५ दिन बाँकी छ, मेरो अपेक्षा के हो भन्दा हामी ११ औँ महाधिवेशनको नोमिनेसन गर्ने तहसम्म पुग्ने बेलामा केपी कमरेडले मैले बिदा लिएँ, अब अरू साथीले नेतृत्व गर्नुहुनेछ र मैले साइडमा बसेर, पद छाड्ने भनेको पार्टी छाड्ने होइन। पद छाड्ने भनेको साइडमा बसेर आफूभन्दा पछाडिकोलाई मेन्टरिङ गर्ने कुरा हो। लोकतन्त्रमा, त्यसमा पनि यो राजनीतिक क्षेत्रमा मेन्टरिङ एकदमै आवश्यक कुरा हो। जुन कुरा हामीले त्यति धेरै स्थापित गर्न सकेका छैनौं। जसरी लोकतान्त्रिक पद्धतिमा उहाँले मान्यता स्थापित गर्नुभएको थियो, अब नेतृत्वले आफू साइडमा बसेर नयाँ आउने पुस्तालाई मेन्टरिङ गर्नुपर्छ भन्ने खालको अर्को मान्यता पनि स्थापित गर्नेतर्फ उहाँ जानुभयो भने उहाँले अहिलेसम्म गर्नुभएको कामको एउटा खाका त छँदै नै छ, राजनीतिक र मानवीय हिसाबबाट पनि उहाँले अर्को मान्यता स्थापित गर्न सक्नुहुनेछ।’ – न्युज एजेन्सी नेपाल
-1746009348.jpg)
