मधेस प्रदेशका मुख्यमन्त्री कृष्णप्रसाद यादवले मंसिर २४ मा विश्वासको मत लिनेबारे आफूले कतै नबोलेको दाबी गरेका छन्।
सेतोपाटीसँग प्रतिक्रिया दिँदै उनले मंसिर २४ गते विश्वासको मत लिने भनेर आफूले कतै नबोलेको बताएका हुन्।
यस बारेमा गठबन्धनमा आबद्ध दलहरूसँग छलफल हुन बाँकी रहेको उनको भनाइ छ।
मुख्यमन्त्रीले मंसिर २४ गते विश्वासको मत लिने भनिए पनि ७ दलीय गठबन्धनमा सहमति हुन नसेकेको भन्दै टीकाटिप्पणी भइरहेको छ।
'तपाईंले मुख्यमन्त्रीमा शपथ लिएपछि मंसिर २४ गते विश्वासको मत लिने भनेर कतै भन्नुभएको थियो र?,' भन्ने प्रश्नमा उनले 'कसैले सुनेको छ र?' भनेर प्रतिप्रश्न गरे।
उनले विश्वासको मत लिने प्रक्रिया नै सुरू नगरेको जानकारी दिए।
विश्वासको मत लिनका लागि ४८ घण्टा अगाडि प्रदेश सभा सचिवालयलाई जानकारी गराउनुपर्ने प्रावधान छ।
‘कहाँबाट कल्ले भन्यो, त्यसको जिम्मेवारी त म छैन, लेख्न त लेख्या छन्,’ उनले भने, ‘त्यस्तो निर्णय भएको भए आज २४ गते हो भैहाल्थ्यो नि! त्यस्तो केही छैन, हामी आफैं भन्छौं नि!’
उनी राजधानी काठमाडौंमा राजनीतिक भेटघाटमा व्यस्त छन्।
संविधानको धारा १६८ (२ ) अनुसार १९ मंसिरमा ६ दलको ७७ जना सांसदको समर्थनमा उनी मुख्यमन्त्री बनेका थिए।
संविधानको धारा १६८ उपधारा (४) मा उपधारा (२) वा (३) अनुसार नियुक्त भएको मुख्यमन्त्रीले ३० दिन भित्र प्रदेश सभाबाट विश्वासको मत प्राप्त गर्नुपर्ने व्यवस्था छ।
-1746009348.jpg)
