मेक्सिकोले चीन र भारतसहित दर्जनौं एसियाली मुलुकहरूमाथि भन्सार दर बढाएको छ।
मेक्सिकोको सिनेटले बिहीबार विभिन्न एसियाली मुलुकहरूमाथि भन्सार बढाउने प्रस्तावलाई पारित गरेको अन्तर्राष्ट्रिय सञ्चारमाध्यमहरुले जनाएको छ।
अन्तर्राष्ट्रिय समाचार संस्था रोयटर्सका अनुसार सिनेटमा उक्त विधेयकको पक्षमा ७६ सांसदले मत दिएका थिए। ५ जना सांसदले विपक्षमा मतदान गर्दा ३५ जना अनुपस्थित थिए।
संसदको तल्लो सदनले उक्त विधेयक यसअघि नै पारित गरेको थियो।
यो सँगै चीन, भारत, दक्षिण कोरिया, थाइल्याण्ड, इन्डोनेशिया लगायत व्यापार सम्झौता नभएका देशहरूबाट हुने आयातमा मेक्सिकोले ३५ देखि ५० प्रतिशतसम्म भन्सार लगाउने भएको हो।
यी देशहरूबाट आयात हुने १ हजार ४०० फरक फरक वस्तुहरूमा मेक्सिकोले भन्सार दर बढाएको हो।
विशेषगरी सवारीसाधन, अटो पार्ट्स, कपडा, प्लास्टिक तथा स्टिलजस्ता वस्तुमा ५० प्रतिशतसम्म कर लगाइनेछ। अधिकांश वस्तुमा भने ३५ प्रतिशतसम्म ट्यारिफ लागू हुने भनेर रोयटर्सले जनाएको छ।
सो निर्णयपछि भारतबाट मेक्सिको जाने करिब १ अर्ब डलर बराबरको सवारीसाधन निर्यात प्रभावित हुने भएको छ।
यो कदमबाट भारतका प्रमुख कार निर्यातकर्ता भोक्सवागन, ह्युन्डाइ, मारुति सुजुकी लगायतका कम्पनी प्रभावित हुनेछन्।
भारतको अटोमोबाइल उद्योग संगठनले सरकारले कर वृद्धि नगर्न मेक्सिकोसँग पहल गरिदिन अनुरोध गरेको पत्रसमेत पठाएको थियो। पत्रमा प्रस्तावित कर वृद्धिले भारतका अटोमोबाइल निर्यातमा प्रत्यक्ष असर पर्ने भन्दै सरकारी हस्तक्षेप आवश्यक रहेको उल्लेख छ।
मेक्सिकोले स्थानीय रोजगारी र उत्पादन उद्योग जोगाउने उद्देश्यका साथ यो कदम चालिएको भनेको छ। तर उसले अमेरिकालाई
विश्लेषकहरूले भने मेक्सिकोले यो निर्णय आगामी दिनमा हुन लागेको अमेरिका-मेक्सिको–क्यानडा समझौता पुनरावलोकनअघि अमेरिकालाई खुसी बनाउन गरेको गरेको भनेका छन्।
मेक्सिकोका व्यवसायीहरूले उच्च करका कारण उत्पादन लागत बढ्ने चेतावनी दिएका छन्।
अहिले २० प्रतिशत रहेको कार आयात कर ५० प्रतिशत बनाइँदा भारतका लागि मेक्सिको जस्तो महत्वपूर्ण बजारमा ठूलो झट्का पर्ने उद्योग विश्लेषकहरूको टिप्पणी छ।
मेक्सिको भारतको तेस्रो ठूलो कार निर्यात बजार मानिन्छ।
भारतले गत वर्ष मेक्सिकोतर्फ ५.३ अर्ब डलरको सामान निर्यात गरेकोमा करिब १ अर्ब डलर बराबरका सवारीसाधन रहेका थिए।
तीमध्ये स्कोडा अटो (भोल्क्सवागन समूह) ले मात्रै ५० प्रतिशत हिस्सा ओगट्छ। ह्युन्डाइले २० करोड डलर, निसानले १४ करोड डलर र सुजुकीले १२ करोड डलर बराबरका कार निर्यात गरेका थिए।
उद्योग समूहले भारत सरकारलाई दिएका विवरणअनुसार मेक्सिकोमा बिक्री हुने १५ लाख कारमध्ये करिब दुई तिहाइ आयात गरिन्छ।
त्यसमध्ये भारतको हिस्सा ६.७ प्रतिशत मात्र छ। साथै भारतबाट मेक्सिको जाने अधिकांश सवारीसाधन एक लिटरभन्दा कम क्षमताका साना कार भएकाले स्थानीय उद्योगसँग प्रत्यक्ष प्रतिस्पर्धा नपर्ने दाबी उद्योग समूहको छ।
मेक्सिकोले लागू गर्न लागेको नयाँ कर संरचनाले भारतका अटो उत्पादकहरूका निर्यात रणनीतिमा पुनर्विचार गर्न बाध्य बनाउने उद्योग विशेषज्ञहरूको भनाइ छ।
निर्यातमार्फत उत्पादन क्षमता उच्च राख्ने भारतीय कम्पनीहरूको मोडेलमा पनि यसले असर पार्न सक्ने अनुमान गरिएको छ।
अमेरिकासँग भन्सार युद्ध लडेको चीनमाथि अरू देशले पहिलो पटक ठूलो दरमा भन्सार लगाएको हो।
चीन मेक्सिकोको दोस्रो ठूलो निर्यातकर्ता हो। गत वर्ष चीनले मेक्सिकोमा १३४ अर्ब डलरको सामान पठाएको अमेरिकी पत्रिका द न्युयोर्क टाइम्सले जनाएको छ। अमेरिकाले भने ३३४ अर्ब डलरको व्यापार गरेको थियो।
चीनले मेक्सिकोको निर्णयको आलोचना गर्दै त्यसलाई गम्भीर क्षति पुर्याउने कदम भनेको छ। चीनको वाणिज्य मन्त्रालयले मेक्सिकोले एकतर्फी नीति हटाउन पनि आग्रह गरेको छ।
ट्रम्प प्रशासनले मेक्सिकोमार्फत अमेरिकी बजारमा चिनियाँ उत्पादन आएको भनेर आरोप लगाउँदै आएका थिए।
-1763886130.jpeg)
-1746009348.jpg)
