नवनियुक्त मन्त्रीहरूले गरे पदभार ग्रहण (तस्बिरहरू)

नवीनबाबु गुरूङ

काठमाडौं, मंसिर २६

नवनियुक्त मन्त्रीहरूले पदभार ग्रहण गरेका छन्।

नवनियुक्त मन्त्रीहरू श्रद्धा श्रेष्ठले महिला, बालबालिका तथा ज्येष्ठ नागरिक मन्त्रालय, कुमार इङ्नामले भूमि व्यवस्था, सहकारी तथा गरिबी निवारण मन्त्रालय, राजेन्द्रसिंह भण्डारीले श्रम, रोजगार तथा सामाजिक सुरक्षा मन्त्रालय र माधव चौलागाईंले वन तथा वातावरण मन्त्रालयमा गएर पदभार ग्रहण गरेका हुन्।

नवनियुक्त मन्त्रीहरूले राष्ट्रपति कार्यालय शीतल निवासमा शुक्रबार अपराह्न साढे ३ बजेतिर शपथ लिएसँगै उनीहरूले पदभार ग्रहण गरेका हुन्।

यो विस्तारसँगै मन्त्रिपरिषद् १४ सदस्यीय पुगेको छ।

भूमि मन्त्रालय सम्हालेका कुमार इङ्नाम 'काठमाडौं स्कुल अफ ल' का प्राध्यापक हुन्। अन्तर्राष्ट्रिय व्यापार तथा मध्यस्थता र वित्तीय अपराधसम्बन्धी कानुनका विज्ञ इङ्नामले थुप्रै किताब लेखेका छन्। काठमाडौं स्कुल अफ लमा आबद्ध हुनुअघि उनी इलामको महेन्द्र रत्न बहुमुखी क्याम्पसमा पढाउँथे।

श्रम मन्त्रालको जिम्मेवारी सम्हालेका राजेन्द्रसिंह भण्डारी नेपाल प्रहरीका पूर्वअतिरिक्त महानिरीक्षक हुन्। उनी केन्द्रीय अनुसन्धान ब्युरो (सिआइबी) का संस्थापक प्रमुख थिए।

त्यस्तै, जनस्वास्थ्य विज्ञ माधव चौलागाईंले कर्णाली क्षेत्रमाथि गहन अनुसन्धान गरेका छन्।