नेकपा (एमाले)को एघारौं महाधिवेशन आजदेखि सुरू हुँदैछ।
भक्तपुरको सल्लाघारीमा दिउँसो १ बजेदेखि उद्घाटन समारोह हुनेछ।
बिहान ११ बजेदेखि उपत्यकाका विभिन्न स्थानबाट जुलुस सल्लाघारी पुग्नेछ।
बन्द सत्र भने आइतबारदेखि हुनेछ।
उद्घाटन समारोहमा अध्यक्ष केपी शर्मा ओलीले सम्बोधन गर्नेछन्।
अन्य दलका अध्यक्ष तथा संयोजकलाई पनि एमालेले उद्घाटन समारोहमा बोलाएको छ।
उनीहरूलाई पनि स्वागत मन्तव्य राख्न दिइने एमालेले जनाएको छ।
एमाले महाधिवेशनका लागि विभिन्न जिल्लाबाट २२ सय बढी प्रतिनिधि काठमाडौं आइसकेका छन्।
यस महाधिवेशनबाट अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलबीच प्रतिस्पर्धा हुने अहिलेसम्मको अवस्थाबाट देखिएको छ।
पोखरेलले अध्यक्षमा उम्मेदवारी दिने घोषणा गरिसकेका छन्।
यद्यपि बन्द सत्रसम्म पुग्दा सहमति पनि हुन सक्ने आकलन गरिएको छ।
सहमति नभए प्रतिनिधिहरूले मतदान गरी नेतृत्व छान्ने छन्।
महाधिवेशनको अघिल्लो दिन शुक्रबार एमाले सचिवालय बैठक बसेको थियो।
बैठकबाट महाधिवेशन पदाधिकारी संख्या नबढाएर १५ सदस्यीय यथावत् नै राख्ने निर्णय गरेको छ।
सहमतिका लागि भनेर पदाधिकारी संख्या बढाउने चर्चा थियो।
महाधिवेशनबाट १५ सदस्यीय पदाधिकारी र २५१ सदस्यीय केन्द्रीय समिति चयन गर्नेछ।
-1763886130.jpeg)
-1746009348.jpg)
