एमाले महाधिवेशन उद्घाटन स्थलमा बिहानैदेखि चहलपहल (तस्बिरहरू)

सुरक्षा जाँचका लागि प्रहरीले गर्‍यो तालिमप्राप्त कुकुर परिचालन

सेतोपाटी संवाददाता

काठमाडौं, मंसिर २७

नेकपा (एमाले)को ११ औं महाधिवेशन आजदेखि सुरू हुँदै छ।

तीन दिनसम्म चल्ने महाधिवेशनका लागि देशभरबाट २ हजार २६२ प्रतिनिधि काठमाडौं आइसकेका छन्।

महाधिवेशनको उद्घाटन समारोह भक्तपुरको सल्लाघारीमा शनिबार हुँदैछ।

उद्घाटन समारोह दिउँसो १ बजेदेखि हुनेछ।

उद्घाटन समारोहका लागि सल्लाघारीमा विशेष मञ्च तयार पारिएको छ।

उद्घाटन स्थलमा बिहानै देखि नेता कार्यकर्ताको चहलपहल देखिएको छ।

कार्यक्रम स्थलमा प्रहरीले पनि बिहानै सुरक्षा चेकजाँच गरिरहेका छन्। प्रहरीले तालिमप्राप्त कुकुर परिचालन गरी महाधिवेशन उद्घाटन स्थलमा सुरक्षा जाँच गरेको छ।

उद्घाटन समारोहमा २ लाख बढी कार्यकर्ताको उपस्थिति रहने एमालेको दाबी छ।

विभिन्न राष्ट्रिय मान्यताप्राप्त दलहरूलाई पनि उद्घाटन समारोहमा शुभकामना मन्तव्यका लागि निम्ता दिइएको छ। यसपालिको महाधिवेशन उद्घाटन समारोहमा विदेशी पाहुना भने बोलाइएको छैन।

उद्घाटन समारोहमा डेढ सय झाँकी प्रस्तुत हुनेछन्। भक्तपुरले विभिन्न जाति, समुदायको कला, सामाजिक–सांस्कृतिक परम्परा झल्कने ५० बढी झाँकी प्रस्तुत गर्नेछ। काठमाडौंले ५० र ललितपुरले पनि त्यति नै संख्यामा झाँकी प्रस्तुत गर्नेछ।

महाधिवेशन उद्घाटन स्थलसम्म पुग्नेगरी विभिन्न स्थानबाट जुलुस निकालिने छ।

एमालेले काठमाडौंतर्फबाट आउने सहभागी सहितको गाडीलाई गट्ठाघरमै रोक्नेछ।

त्यहाँबाट महाधिवेशन स्थलसम्म ३.१ किलोमिटर दूरी रहेको छ। त्यति दूरी जुलुससहित पुग्ने गरी व्यवस्थाबपन मिलाइएको उनले बताए। पूर्वी नाका हुँदै आएका गाडीहरू जगातीमै रोकिनेछन्। त्यहाँका इँटा भट्टा, प्लटिङ आदि स्थलमा पार्किङ व्यवस्थापन गरिएको छ।

पोलिटब्युरो सदस्य महेश बस्नेतले जुलुसहरू सकेसम्म सडकको दायाँ–बायाँ रहेको सर्भिस लेन प्रयोग गरी अघि बढाइने बताएका छन्।

सहभागीहरू कार्यक्रमको अन्तिमसम्म सल्लाघारीको चौरमै उपस्थित रहन निर्देशित गरिएको पनि उनले बताएका छन्।

तस्बिरहरूः

sallaghari-(23)-ink-1765598034.jpeg