एमाले महाधिवेशन स्थलमा भेला हुन थाले कार्यकर्ता (तस्बिरहरू)

नवीनबाबु गुरूङ

काठमाडौं, मंसिर २७

भक्तपुरको सल्लाघारीमा हुने नेकपा एमालेको ११औं महाधिवेशनका लागि कार्यकर्ता तथा नेताहरू भेला हुन थालेका छन्।

शनिबार दिउँसो महाधिवेशनको उद्घाटन हुनेछ। कार्यक्रममा २ लाख मानिसको उपस्थिति हुने एमालेले दाबी गरेको छ।

उद्घाटन समारोहका लागि अन्य १६ दलका नेताहरूलाई पनि बोलाइएको छ।

एमाले ललितपुरका अध्यक्ष पुरूषोत्तम आचार्यका अनुसार टाढा-टाढा जिल्लाका सहभागीहरू गाडी रिजर्भ गरेर काठमाडौं आइरहेका छन्।

‘हामीले पाँच लाख जनसमुदाय उतार्ने तयारी गरेका थियौं। अहिलेसम्मको आकडाअनुसार न्यूनतम दुई लाख नागरिकको सहभागिता रहने पक्कापक्की भएको छ। हामी अहिले पूर्व, पश्चिम र उत्तरतिरबाट आउने गाडीहरूको व्यवस्थापनमा काम गरिरहेका छौं,’ आचार्यले सेतोपाटीसँग भने।

स्रोतका अनुसार बिहानसम्म करिब चार सय गाडीमा १४ हजार बढी मानिसहरू काठमाडौं आइपुगेका छन्।

महाधिवेशनमा डेढ सय झाँकी प्रस्तुत हुनेछन्। भक्तपुरले विभिन्न जाति, समुदायको कला, सामाजिक–सांस्कृतिक परम्परा झल्कने ५० बढी झाँकी प्रस्तुत गर्नेछ। काठमाडौंले ५० र ललितपुरले पनि त्यति नै संख्यामा झाँकी प्रस्तुत गर्नेछ।

एमालेले भक्तपुरमा पहिलो पटक महाधिवेशन उद्घाटन गर्दैछ। सल्लाघारी पश्चिमतर्फको खुला चौरलाई एमालेले उद्घाटन स्थल बनाएको छ।

एमालेले काठमाडौंतर्फबाट आउने सहभागी सहितको गाडीलाई गट्ठाघरमै रोक्नेछ।

त्यहाँबाट महाधिवेशन स्थलसम्म ३.१ किलोमिटर दूरी रहेको छ। त्यति दूरी जुलुससहित पुग्ने गरी व्यवस्थापन मिलाइएको उनले बताए। पूर्वी नाका हुँदै आएका गाडीहरू जगातीमै रोकिनेछन्। त्यहाँका इँटा भट्टा, प्लटिङ आदि स्थलमा पार्किङ व्यवस्थापन गरिएको छ।

‘ललितपुरबाट आएको गाडी, सहभागीहरू शंखघर चोकमा जम्मा हुने र त्यहाँबाट जुलुससहित सभा स्थल जाने तय गरिएको छ,’ उनले भने।

पोलिटब्युरो सदस्य महेश बस्नेतले जुलुसहरू सकेसम्म सडकको दायाँ–बायाँ रहेको सर्भिस लेन प्रयोग गरी अघि बढाइने बताएका छन्।

सहभागीहरू कार्यक्रमको अन्तिमसम्म सल्लाघारीको चौरमै उपस्थित रहन निर्देशित गरिएको पनि उनले बताएका छन्।

yemale-mahadhibesan-(22)-ink-1765602339.jpeg