नेकपा एमालेका अध्यक्ष केपी शर्मा ओलीले संसद पुनर्स्थापना गराएरै छाड्ने दाबी गरेका छन्।
नेकपा एमालेको एघारौं महाधिवेशन उद्घाटन समारोहमा ओलीले पार्टीको महाधिवेशनलाई लोकतन्त्र जोगाउने अभियान भएको बताएका छन्।
'एमालेललाई होच्याउने र जिस्क्याउने काम कसैले नगरोस्। समाप्त पार्ने इच्छा त मनबाट सधैंका लागि हटाइदिए हुन्छ,' ओलीले भने, 'देशलाई लोकतन्त्रमा फर्काएर छाडिन्छ। संसद पुनर्स्थापना गराएर छाडिन्छ। संविधान मिचिएको छ, ट्र्याकमा ल्याएर छाडिन्छ। यो एमालेको संकल्प हो। एघारौं महाधिवेशनको संकल्प हो।'
ओलीले नेकपा एमाले देश जोगाउने अभियानका रूपमा रहेको दाबी पनि गरे।
उनले जनताले चुनेका प्रतिनिधिलाई घर फर्काएर संविधानले चिन्दै नचिनेको व्यक्तिलाई सरकारमा ल्याइएकोमा आपत्ति पनि जनाएका छन्।
सबै दलको सहमतिमा प्रतिनिधिसभाबाटै नयाँ सरकार गठन गर्नुपर्नेमा बाहिरका व्यक्तिलाई सरकारमा ल्याएर संविधान मिचिएको उनले टिप्पणी गरे।
बाहिरबाटै व्यक्ति ल्याउनुपर्ने अवस्थामा पनि सबै दलको सहमतिमा प्रतिनिधिसभाबाट संविधान संशोधन गर्न सकिने विकल्प हुँदाहुँदै संसद नै विघटन गरिएको उनले बताए।
'यसरी जनताले चुनेका प्रतिनिधि घर फर्काउनु भनेको जनतालाई राजनीतिबाट बाहिर राख्नु हो,' उनले भने।
त्यही भएर नेकपा एमालेले सुरूदेखि आजसम्म निरन्तर प्रतिनिधिसभा पुनर्स्थापनाको माग राख्दै आएको र संसदबाटै नयाँ सरकार चुनेर संविधानलाई ट्रयाकमा फर्काउनुपर्ने अडान राख्दै आएको उनले बताए।
उनले भदौ २४ को घटना असन्तुष्ट समूहको प्रदर्शन नभएको बताएका छन्। उक् घटनामा राज्यको मेरूदण्ड भाँचिदिने षड्यन्त्र र योजना लुकेको उनको दाबी छ।
'कुनै भ्रममा पर्नु हुदैँन। स्थिरताको वाहक बनिरहेको संवैधानिक प्रक्रियाबाट बनेको सरकार हटाउन त देशलाई खरानी पार्नै पर्ने थिएन। संसदबाटै त्यो काम गर्न सकिन्थ्यो। या अर्को निर्वाचन कुर्न सकिन्थ्यो', ओलीले भने, 'तर यो संविधान संवैधानिक पक्रिया र ७ दशक लामो कठिन संघर्षका रुपमा प्राप्त लोकत्नत्र ध्वस्त पारेर शुन्यता सिर्जना गर्ने र अस्थिरता बढाउने र राज्य विहीनताको अवस्थामा पुर्याउने अराजक दीर्घ तयारी सहितको गम्भीर षड्यन्त्र त्यो थियो,' उनले भने।
ओलीले नवयुवाहरुले संविधानले दिएको अधिकार प्रयोग गर्दै शान्तिपूर्ण प्रदर्शन गर्न अनुमति दिएको भए पनि घुसपैठ भएको बताए।
'स्वार्थ्य समूह प्रवेश गरे। अनि हिंसा र तोडफोड त के फूलको हाँगा पनि भाँच्दैनौँ र निषेधित क्षेत्र तोड्दैनौँ भनेका युवाहरुलाई संसद भवनमा आगजनी र तोडफोड गर्न दुरुत्साहन गर्ने र त्यसैको आडमा नीहित स्वार्थ्य पूरा गर्ने युवा विद्यार्थीको ज्यान जाने अकल्पिनिय अवस्था सृजना भयो', ओलीले भने, 'भदौ २३ गते गोली लागेका र भदौ २४ गते आक्रमणमा परि मारिएका प्रहरी र नागरिकप्रति भावपूर्ण श्रद्धाञ्जली व्यक्त गर्दछु।'
-1763886130.jpeg)
-1746009348.jpg)
