नेताहरूलाई स्थानहद तोकिनुले धेरै प्रश्न उठाएको छ: कार्यवाहक सभापति खड्का

सेतोपाटी संवाददाता

काठमाडौं, मंसिर २७

नेपाली कांग्रेसका कार्यवाहक सभापति पूर्णबहादुर खड्काले नेताहरूलाई स्थान हद तोकिनुले धेरै प्रश्न उठाएको बताएका छन्।

भदौ २३ र २४ गतेको घटनाका सन्दर्भमा पूर्वन्यायाधीश गौरीबहादुर कार्की नेतृत्वमा जाँचबुझ आयोग बनेको र उक्त आयोगले तत्कालीन प्रधानमन्त्री केपी शर्मा ओली लगायतलाई स्थान हद तोकेको छ।

नेताहरूलाई स्थानहद तोकेकोप्रति लक्ष्य गर्दै कार्यवाहक सभापति खड्काले भने, ‘नेताहरूका स्थानहदका निर्णयहरू लगायतका कार्यहरूले धेरै प्रश्नहरू उठाएका छन्, यसतर्फ आयोग सतर्क हुन जरूरी छ।’

एमालेको ११ औं महाधिवेशन उद्घाटन सत्रमा शुभकामना दिँदै कार्यवाहक सभापति खड्काले सरकारले चुनावी वातावरण तयार नगरेको पनि बताए।

उनले कांग्रेसलगायत दल युवा पुस्ताले नै स्थापना गरेको भए पनि कुनै एक पुस्ताको मात्र मुद्दा नबोक्ने बताए।

‘सबै पुस्ताका जनताको साझा राजनीतिक संगठन हो,’ उनले भने, ‘अरू कसैले संघर्ष गरेर ल्याएको व्यवस्थामा हामीले हाम्रो पालो खोइ भनेका पनि छैनौं।’

उनले हाल संविधानबाहिरबाट सरकार बनेको र लगत्तै प्रतिनिधि सभा विघटन गरिएको अवस्था रहेको बताए।

‘यो असंवैधानिक कदम र अदालतको नजिरविपरीत भनेका छौं,’ उनले भने, ‘सर्वोच्च अदालतमा विचाराधीन विषयलाई निर्वाद खुला राख्दै मुलुकलाई पुन: संवैधानिक बाटोमा फर्काउने आधार निर्वाचन हुन्छ भन्ने हामीलाई विश्वास छ। यसका लागि शान्तिपूर्ण, निष्पक्ष र भयरहित वातावरण निर्माण गर्ने दायित्व सरकारको हो।’

निर्वाचनका लागि शान्तिपूर्ण अवस्थाको वातावरण बनाउनने जिम्मा सरकारको भएको बताए। तर सरकारका गतिविधि भने त्यसतर्फ अघि बढेको नदेखिएको उनले बताए।