नेपाली कांग्रेसका नेता शेखर कोइरालाले पार्टीभित्र वरिष्ठ र युवा पुस्ताको मिलनविन्दु आफू रहेको बताएका छन्।
युवाका लागि संघमा २०, प्रदेशमा ३० र स्थानीय तहमा ४० प्रतिशत प्रतिनिधित्वको माग आफूले पहिले नै राखेको भए पनि सुनुवाइ नभएको उनले बताए।
प्रजातन्त्र सेनानी संघका केन्द्रीय समितिका पदाधिकारी एवं सदस्यसँग काठमाडौंको विशालनगरस्थित सम्पर्क कार्यालयमा भएको भेटघाटमा उनले नेपालको लोकतान्त्रिक आन्दोलनमा प्रजातन्त्र सेनानीहरूले महत्त्वपूर्ण योगदान पुर्याएको बताए।
देश र पार्टी अत्यन्तै कठिन मोडमा उभिएको बताएका कोइरालाले कांग्रेस पुनर्निर्माणका लागि अझै सेनानीहरूको अनुभवको सहयोगको खाँचो रहेको बताए।
‘सयौं योद्धा र युवाहरूको रगत पसिनाले निर्माण भएको पार्टीमा अहिले सैद्धान्तिक बिचलन आएको छ,’ कोइरालाले भने, ‘पार्टीभित्र मूल्य, मान्यता र निष्ठाको पनि पुनर्निर्माण जरूरी छ।’
जिल्ला-जिल्लाबाट आएका सेनानीहरूलाई पार्टीको आसन्न महाधिवेशन र आम निर्वाचनमा होमिन कोइरालाले निर्देशन दिएका थिए।
-1746009348.jpg)
