नेपाली कम्युनिस्ट पार्टीका सांसद युवराज दुलालले सरकारले प्रतिनिधि सभा नियमावली ३८ को १ को सुविधा लिइरहँदा सोही नियमाली ५६ (१) को कर्तव्य पूरा गर्नुपर्ने बताएका छन्।
मंगलबार प्रतिनिधि सभा बैठकमा बोल्दै उनले प्रधानमन्त्रीले प्रतिनिधि सभामा आएर सांसदले उठाएका प्रश्नको जबाफ दिनुपर्ने बताएका हुन्।
‘हामीले केही गल्ती गरेका छौं भन्ने लाग्दैन, हामीले गल्ती गरेका छौं भने सभामुखमार्फत सरकारले हामीलाई भनोस्, संविधानको कुरा कार्यान्वयन गर्नुपर्छ भनेर तिमीहरूले कसरी भन्न पाउँछौ? हामीलाई प्रश्न होस्। प्रतिनिधि सभा नियमावली ३८ को १ को सुविधा लिने सरकारले, त्यो अधिकारको प्रयोग गर्ने सरकारले सोही नियमाली ५६ (१) को कर्तव्य पूरा गर्नुपर्छ कि पर्दैन? यो संसदमा यो जबाफ हामीले खोज्नु जायज हो कि नाजायज?,’ उनले भने।
संसदीय व्यवस्थामा बहुमत भन्ने कुरा वास्तविक बहुमत पनि नभएको बताउँदै प्रतिपक्षी पनि हुन्छन् भन्ने हेक्का राख्नुपर्ने बताए।
‘भलै अहिले सत्तारूढ दल बहुमतमा छ, हामीले स्वीकार गरेका पनि छौं। सँगसँगै प्रश्न गर्ने आधा हिस्सा प्रतिपक्षीको बेञ्चमा पनि छ भन्ने हेक्का राख्नुपर्छ,’ उनले भने।
केही दिनअघि संसदमा वैकल्पिक विकास वित्त परिचालन सम्बन्धनमा बनेको विधेयक पारित भएको घोषणा गरिएको तर विधेयकहरू पारित गर्ने सन्दर्भमा सत्तापक्षका सांसदहरूले समेत आफ्नो योगदान गर्न नपाएको दुलालले बताए।
‘संसदमा तर्क वितर्क गरेर, दूरगामी र गम्भीर महत्त्व राख्ने विधेयक पारित गर्नुपर्ने हुन्छ। सरकारले जे ल्यायो, बहुमत छ, सबै कुरा पारित गर्ने हो भने हामी भत्ता खाएर यो संसदमा किन बस्नुपर्यो। बहुमत त छँदैछ, सबै सरकारले ल्याएपछि सभामुखज्यूले प्रमाणीकरणका लागि राष्ट्रपतिकहाँ पठाइदिए भइहाल्छ, सबै प्रक्रिया किन पालना गर्नुपर्यो त? यही नियमावलीमा लेखेको अन्य कुरा पालना गर्नुनपर्दा विधेयक पास गर्ने प्रक्रिया किन पालना गर्नुपर्यो?,’ उनले भने।
