प्रधानमन्त्री बालेन शाहले बजेट भाषणपछि प्रतिनिधिसभा बैठकमा उपस्थित भएर सांसदहरूले सोधेका प्रश्नको जबाफ दिने सभामुख डिपी अर्यालले बताएका छन्।
उनले प्रतिनिधिसभाको मंगलबार बैठकमा उक्त जानकारी दिएका हुन्।
प्रतिपक्षी सांसदहरूले संसद बैठकमा प्रधानमन्त्रीको उपस्थिति माग गर्दै लगातार गरिरहेको विरोधबीच सभामुख अर्यालले भने, 'माननीय सदस्यहरूले राख्नुभएको विषयमा मेरो ध्यानाकर्षण भएको छ। केही दिनदेखि हामी एउटै विषयमा प्रवेश गरिरहेका छौं र त्यसैमा संवाद गरिरहेका छौं।'
उनले प्रधानमन्त्रीले सरकारका तर्फबाट सदनमा उपस्थित हुनुपर्ने, सार्वभौम संसदमा उठ्ने प्रश्नको जबाफ दिनुपर्ने, आफ्नो कुरा राख्नुपर्ने र जनलाई सम्बोधन गर्नुपर्ने भनी प्रतिपक्षी सांसदहरूले उठाएको विषय अत्यन्त जायज, संविधानसम्मत, नियमवालीसम्मत र कानुनसम्मत रहेको बताए।
'जनताको माग पनि त्यही हो,' उनले भने, 'यसमा हामीले विपक्षी दलका नेताहरूसँग पटक पटक संवाद गरिरहेका छौं। दलका मुख्य सचेतकज्यूहरूसँग, दलका नेताहरूसँग संवाद गरिरहेका छौं। सत्तापक्षका मुख्य सचेतकसँग पनि मेरो संवाद भइरहेको छ। त्यति मात्र नभएर स्वयं सरकारसँग र सम्माननीय प्रधानमन्त्रीज्यूसँग मेरो संवाद भइरहेको छ।'
उनले अगाडि भने, 'मैले यहाँलाई जानकारी गराइसकेको छु, सम्माननीय प्रधानमन्त्रीज्यू आउने तयारी गर्दै हुनुहुन्छ। मैले योभन्दा अगाडि पनि यहाँलाई भनेको थिएँ, सदनमा भइरहेको विषयमा सरकार जानकार छ, सम्माननीय प्रधानमन्त्रीज्यू जानकार हुनुहुन्छ। आज पनि यहाँहरूले राख्नुभएको विषयमा मेरो ध्यानाकर्षण भएको छ। त्यसैले हामी कार्यसूचीमा रहेको आजको कार्यक्रम अघि बढाऔं।'
उनले केही दिनमै बजेट आउन लागेकाले त्यसै सन्दर्भमा प्रधानमन्त्री शाहले सदनमा उपस्थिति भएर सांसदहरूले राखेका प्रश्न र जिज्ञासाको जबाफ दिने बताए।
'केही दिनमै बजेट आउँदैछ। मलाई आशा र विश्वास छ र सत्तापक्षका मुख्य सचेतकज्यूबाट पनि मैले जानकारी पाएको छु, प्रधानमन्त्रीज्यूले यहाँहरूले राख्नुभएको जिज्ञासा र प्रश्नमा उत्तर दिने तयारी गरिररहनुभएको छ,' सभामुख अर्यालले भने, 'प्रधानमन्त्रीज्यूले छिट्टै सदनमा उपस्थिति भएर जबाफ दिनुहुनेछ।'
सभामुख अर्यालले यति भनेपछि संस्कृति, पर्यटन तथा नागरिक उड्डयनमन्त्री गनेश पौडेललाई पर्यटन विधेयक २०८२ माथि विचार गरियोस् भन्ने प्रस्ताव प्रस्तुत गर्न अनुमति दिए।
त्यसलगत्तै नेपाली कांग्रेस, नेकपा एमाले, नेपाली कम्युनिस्ट पार्टी, श्रम संस्कृति पार्टी, राष्ट्रिय प्रजातन्त्र पार्टी लगायतका प्रतिपक्षी दलका सांसदहरूले आ-आफ्नो कुर्सीबाट उभिएर विरोध जनाए।
प्रतिपक्षीहरूको विरोधपछि सभामुख अर्यालले रोस्ट्रममा पुगिसकेका पर्यटनमन्त्री पौडेललाई विधेयक प्रस्तुत गर्नबाट एकछिन रोके।
अनि सांसदहरूलाई सम्बोधन गर्दै भने, 'मैले सबैलाई बोल्ने समय दिएँ, माननीय सांसदज्यूहरूले आफ्नो कुरा राख्नुभयो। मैले पनि आफ्नो कुरा राखेँ। यहाँहरूले राख्नुभएको कुरामा मेरो ध्यानाकर्षण भएको छ। सरकारको ध्यानाकर्षण भएको छ। मैले माननीय सांसदज्यूहरूलाई बस्नुस् भनेर अनुरोध गरेँ।'
यति भन्दा पनि प्रतिपक्षी सांसदहरूको विरोध जारी रहेपछि उनले पर्यटनमन्त्री पौडेललाई रोस्ट्रमबाट फेरि आफ्नो कुर्सीमा फिर्ता पठाए। र, फेरि भने, 'प्रधानमन्त्रीज्यूले संसदमा उपस्थित भएर जबाफ दिने तयारी गरिरहेको सूचना प्राप्त भएको छ।'
त्यसपछि पनि प्रतिपक्षी सांसदहरूको विरोध जारी रहेपछि उनले त्यसकै बीचमा पर्यटनमन्त्रीलाई विधेयक प्रस्तुत गर्न अनुमति दिए।
प्रतिपक्षी सांसदहरूको विरोधबीच पर्यटनमन्त्री पौडेलले पर्यटन विधेयक २०८२ माथि विचार गरियोस् भन्ने विधेयक प्रस्तुत गरेका थिए।
