महोत्तरीका राष्ट्रिय स्वतन्त्र पार्टीका सांसद दीपककुमार साहले सरकारले कर युरोपको जस्तो लिने र सुविधा सोमालियाको जस्तो दिँदै आएको टिप्पणी गरेका छन्।
प्रतिनिधि सभाको बुधबारको बैठकमा बोल्दै उनले आय करको न्यूनतम सीमालाई अझ बढाउन पनि माग गरे।
‘नेपालमा ३९ प्रतिशतसम्म आयकर छ। ५ लाखसम्मको आयमा मात्रै १ प्रतिशत आम्दानी कर लाग्छ, त्यसलाई बढाएर १० देखि १२ लाखसम्म गरियोस्। दुःखको साथ भन्नुपर्छ अहिले सम्मको सरकारले कर युरोपको जस्तो लिन्छ, सुविधा सोमालियाको जस्तो दिँदै आएको छ,’ उनले भने।
उनले प्रजाको सुखमा सरकारको सुख हुने र प्रजाको भलाइमै सरकारको भलाइ हुने पनि बताए।
‘हामीले देख्यौं विगत पाँच आर्थिक वर्षदेखि महँगी एकदम बढेको छ। लगभग ३८–४०, तलब १५ प्रतिशत मात्रै बढेको छ। वास्तविक ज्यालामा २५ प्रतिशतको गिरावट आएको छ।
‘यसकारण म सरकारलाई आग्रह गर्न चाहन्छु कि मुद्रास्फीतिसँगै तलब पुनरावलोकनको कानुनी प्रबन्ध नै गरियोस्,’ उनले भने।
