नेपाली कम्युनिस्ट पार्टी (नेकपा) संयोजक पुष्पकमल दाहाल 'प्रचण्ड'ले राष्ट्रिय सरोकारका मुद्दामा संवाद र सहकार्य गर्ने संस्कार बन्नुपर्ने बताएका छन्।
गणतन्त्र दिवसको अवसरमा शुभकामना सन्देश जारी गर्दै संयोजक प्रचण्डले राजनीतिक मतभेद भए पनि राष्ट्रिय मुद्दाहरूमा संवाद र सहकार्य हुनुपर्ने बताएका हुन्।
'हामीबीच राजनीतिक मतभेद हुनसक्छन्, संसदीय परिपाटीमा संख्यात्मक अंकगणित फरक हुनसक्छ, तर राष्ट्रिय सरोकारका मुद्दामा संवाद र सहकार्य हाम्रो संस्कार बन्नुपर्छ। संविधान, लोकतन्त्र र गणतन्त्रको रक्षा हामी सबैको पहिलो जिम्मेवारी हो,' उनले भनेका छन्।
संयोजक प्रचण्डले परिवर्तनका उपलब्धिलाई कमजोर बनाउने कुनै पनि प्रयासप्रति सचेत हुनुपर्ने पनि बताएका छन्। उनले नेपाली जनताको संघर्षबाट प्राप्त उपलब्धिको संरक्षण गर्दै समृद्ध, न्यायपूर्ण र आत्मनिर्भर नेपाल निर्माणमा सबै एकजुट बन्नुपर्ने बताए।
उनले गणतन्त्र कुनै व्यक्ति वा दलको नभई परिवर्तनको आकांक्षी सम्पूर्ण नेपाली जनताको साझा उपलब्धि रहेको बताएका छन्। 'तसर्थ, संविधानको मूल मर्मबाट पछि हट्ने वा यसका मूल्य, मान्यता र उपलब्धिमाथि सम्झौता गर्ने छुट कसैलाई छैन,' उनले भनेका छन्।
संविधानको कार्यान्वयनमा देखिएका कमजोरीहरूलाई सच्याउँदै, राज्य सञ्चालनको प्रक्रियामा विद्यमान परम्परागत परिपाटी र स्वेच्छाचारिताको अन्त्य गर्नु आजको आवश्यकता रहेको पनि प्रचण्डले बताएका छन्।
उनले गणतन्त्रको विकल्प अझै समुन्नत गणतन्त्र मात्रै हुन सक्ने बताएका छन्।
'त्यसका लागि समावेशी, पूर्ण समानुपातिक व्यवस्था सुनिश्चित गर्दै उपेक्षित, उत्पीडित वर्ग, समुदाय र क्षेत्रका अधिकारलाई झनै मजबुत बनाउनु अपरिहार्य छ,' संयोजक प्रचण्डले भनेका छन्।
