सार्वजनिक लेखा समितिको बैठकमा रास्वपा सांसद खगेन्द्र सुनारले आफूमाथि गरेको व्यवहारबारे ध्यानाकर्षण गराउन प्रहरी महानिरीक्षक (आइजिपी) दानबहादुर कार्कीले प्रतिनिधिसभाका सभामुख डोलप्रसाद अर्यालसँग आज शुक्रबार भेट गर्दै छन्।
शुक्रबार दिउँसो ३ बजे कार्की र सभामुखबीच भेटघाटको समय तय भएको सभामुख अर्यालकी प्रमुख स्वकीय सचिव मुना कुँवरले जानकारी दिइन्।
बुधबार लेखा समिति बैठकमा सांसद सुनारले आफू र प्रहरी संगठनलाई गरेको व्यवहारबारे सभामुखको ध्यानाकर्षण गराउन आइजlपी कार्कीले भेट्न समय मागेका थिए।
सांसद सुनारले निर्वाचन प्रहरीको पोसाक खरिदमा भ्रष्टाचारको आरोप लगाउँदै आइजिपी कार्कीमाथि 'अमर्यादित' टिप्पणी गरेका थिए।
'प्रहरीको भाटा खरिदमा समेत भ्रष्टाचार हुनु दुर्भाग्यपूर्ण छ। विपन्न वर्गका छोराछोरी प्रहरीमा भर्ना भएर देशको सेवा गरिरहेका छन्, तर उनीहरूले प्रयोग गर्ने सामग्रीको खरिदमा माथिल्लो निकायबाट ब्रह्मलुट भइरहेको छ। वर्दी लगाएर वा पदमा बसेर आफूमाथिको छानबिनलाई प्रभावित पार्न पाइँदैन,' सुनारले भनेका थिए, 'सार्वजनिक खरिदमा हुने अनियमिततालाई फौजदारी अभियोगका रूपमा अगाडि बढाउनुपर्छ।'
जबाफमा महानिरीक्षक कार्कीले निष्ठापूर्ण काम गरेको मान्छेलाई लेखा समितिमा ल्याएर जे मन लाग्यो त्यही भन्ने काम गरेको भन्दै आपत्ति जनाए।
'जे मन लाग्यो त्यही भन्ने स्थान होइन होला त यो। कुनै पनि ठाउँको एउटा सामान्य मर्यादा त हुन्छ होला नि,' कार्कीले भनेका थिए।
सांसद र प्रहरी महानिरीक्षक वाद-प्रतिवादमा ओर्लिँदा संसदीय समितिको गरिमा घटेको टिप्पणी भएपछि सभामुख अर्यालले चासो समेत देखाएका छन्। उनले समिति सभापति भरतबहादुर खड्का, समिति सचिव बबिता मिश्र र संघीय संसद सचिवालयका महासचिव पद्मप्रसाद पाण्डेयसँग छलफल गरेका छन्।
त्यस क्रममा सभामुखले जनप्रतिनिधिले बैठकमा संयम भएर धारणा राख्नुपर्ने आवश्यकता औंल्याएको समिति सभापति खड्काले बताएका छन्।
'मर्यादित, संयम र शिष्ट भएर विषयवस्तुभित्र रहेर सांसदहरूले धारणा राख्नु उपयुक्त हुने सभामुखले बताउनुभयो,' खड्काले सेतोपाटीसँग भने, 'जनप्रतिनिधिको बोली शिष्ट र भाषा मर्यादित हुनुपर्छ भन्नुभयो।'
यसबीच गृहमन्त्री सुधन गुरूङले लेखा समिति बैठकमा गृहसचिव राजकुमार श्रेष्ठ र आइजिपी दानबहादुर कार्कीमाथि भएको घटनामा आफ्नो ध्यानाकर्षण भएको बताएका छन्।
प्रतिनिधिसभाको कानुन, न्याय तथा मानवअधिकार समितिमा शुक्रबार बोल्दै गृहमन्त्री गुरूङले गृहसचिव र आइजिपीमाथि गरिएको व्यवहार आफ्नो ध्यानाकर्षणमा रहेको बताए।
'मेरो अनुपस्थितिमा गृहसचिव र नेपाल प्रहरीका आइजिपीलाई जुन व्यवहार सार्वजनिक लेखा समितिमा भयो, त्यसमा मेरो ध्यानाकर्षण भएको छ,' उनले भने, 'यो राम्रो भएन। उजुरीका भरमा न्यायाधीश बन्न मिल्दैन। आरोप लगाउन पाइयो भन्दैमा चरित्र हत्या गर्न पाइँदैन। यसबारे गृह मन्त्रालयको ध्यानाकर्षण भएको छ। हामी खुसी छैनौं।'
उनले आइजिपीको कामको आफू प्रत्यक्षदर्शी रहेको र गृह मन्त्रालयको निर्देशनमा दिनरात खटिरहेको बताएका थिए।
यो पनि पढ्नुहोस्:
-1786701204.jpg)
