नेकपा एमालेका अध्यक्ष केपी शर्मा ओली र महासचिव शंकर पोखरेलले छुट्टाछुट्टै रूपमा पूर्वराष्ट्रपति विद्यादेवी भण्डारीलाई भेटेका छन्।
गत बिहीबार एमाले अध्यक्ष ओलीले एमालेकी पूर्वउपाध्यक्षसमेत रहेकी भण्डारीलाई भेटेर साथ दिन आग्रह गरेका थिए।
जबाफमा भण्डारीले आफू पार्टी पुनर्गठनको पक्षमा रहेको स्पष्ट पारेको स्रोतले बतायो।
‘तपाईंले पार्टी चलाउन सक्नुभएन। कस्तो पार्टी कस्तो भयो। अब तपाईंले सहजीकरण गर्दा नै राम्रो हुन्छ,’ भण्डारीको भनाइ उद्धृत गर्दै स्रोतले भन्यो, ‘तपाईंले आफ्नै टिमलाई जोगाउन सक्नुभएन। अनि फरक मत राख्नेलाई पनि टिक्न दिनुभएन।’
पार्टीमा तत्काल नेतृत्व हस्तान्तरण गर्ने अवस्था नरहेको र उपयुक्त पात्र पनि नरहेको अध्यक्ष ओलीको टिप्पणी थियो।
जबाफमा भण्डारीले व्यक्तिभन्दा पनि विधि ठूलो कुरा रहेको प्रतिक्रिया दिएकी थिइन्।
भण्डारीलाई भेट्न एमाले महासचिव पोखरेल पनि बालुवाटारस्थित निवास पुगेका थिए।
निर्वाचनमा पराजित हुनुको कारण र पार्टी कमजोर बन्नुको कारणबारे समीक्षा गर्नसमेत अध्यक्ष ओलीलाई भण्डारीले सुझाव दिएकी थिइन्।
पोखरेलले ‘निर्वाचन समीक्षा तथा पार्टी पुनर्गठन कार्यदल’को प्रतिवेदनबारे जानकारी गराएका थिए भने ओलीसँगको भेटबारे चासो राखेका थिए।
भण्डारीले त्यो भेटलाई अन्य तरिकाले व्याख्या गर्न जरूरी नरहेको र आफू पार्टी पुनर्गठनकै पक्षमा रहेको स्पष्ट पारेकी थिइन्।
‘हामीले विगतमा उठाएकै एजेन्डालाई अहिले कार्यदलले समेटेको छ। यो कुनै व्यक्तिले तयार पारेको भन्दा पनि कार्यकर्ताले दिएको सुझाव हो,’ भण्डारीनिकट एक नेताले भने, ‘तलका कार्यकर्ताअनुसार पार्टी चल्ने हो भने पार्टी पुनर्गठनको विकल्प छैन। व्यक्तिभन्दा पनि विधिअनुसार पार्टी चल्नुपर्छ भन्नेमा हामी दृढ छौँ।’
निर्वाचन समीक्षा तथा पार्टी पुनर्गठन कार्यदलले पार्टी कमजोर हुनुमा ओलीको कार्यशैली नै मुख्य कारक रहेको निष्कर्षसहित पार्टीलाई पुनर्गठन गर्नुपर्ने सुझाव दिएको छ।
कार्यदलका संयोजक एवं उपाध्यक्ष रामबहादुर थापा ‘बादल’ले प्रतिवेदनलाई स्वीकार गरेका छैनन्। तर कार्यदलका बहुमत सदस्य भने प्रतिवेदनको पक्षमा छन्।
अध्यक्ष ओलीले प्रतिवेदन पुनर्लेखन गर्न दबाब दिए पनि कार्यदलका सदस्यसचिव रहेका महासचिव पोखरेलले मानेका छैनन्। आफूलाई हटाउने गरी प्रतिवेदन ल्याएको भन्दै ओलीले कार्यदलका संयोजक बादललाई काउन्टर प्रतिवेदन लेख्न लगाएका थिए। एउटै प्रतिवेदन बनाउने भन्दै काभ्रेको पनौतीमा कार्यदलको आवासीय बैठक बसेको थियो।
शनिबारदेखि सोमबारसम्म चलेको बैठकमा कुनै सहमति नभएपछि उपाध्यक्ष थापा, अर्का उपाध्यक्ष विष्णु पौडेल र महासचिव शंकर पोखरेललाई जिम्मा दिइएको छ। तीन नेताले असोज १ गते कार्यदलको बैठकमा सहमतिको प्रस्ताव ल्याउने सहमति भएको छ।
-1746009348.jpg)
