यस्तो रह्यो फिदिमको महिनावारी मेला (फोटो फिचर)

अनुषा अधिकारी

काठमाडाैं, पुस १७

बिहीबार फिदिम- १ मा आयोजित महिनावारी मेलामा। तस्बिर सौजन्यः इनिसियएसन फर चेन्ज

पाँचथर जिल्लाको फिदिम नगरपालिका वडा नं १ मा बिहीबार महिनावारी मेला सम्पन्न भएको छ।

फिदिम नगरपालिकाको प्रायोजन र 'हेल्पिङ ह्यान्ड्स पाँचथर' को सहआयोजनमा 'इनिसिएसन फर चेन्ज' संस्थाले पहिलोपटक महिनावारी मेला आयोजना गरेको हो।

'महिनावारी हाम्रो भाग्यवारी' नारासहित फिदिमका स्थानीयलाई महिनावारीका ज्ञानबारे सचेत गराई चलिआएको अन्धविश्वास हटाउने मेलाको मुख्य उद्देश्य रहेको 'इनिसिएसन फर चेन्ज' संस्थाकी अध्यक्ष विभिषा बुढाथोकी बताउँछिन्।

विभिषाका अनुसार महिनावारीलाई पनि रमाइलो ढंगले मनाउन सकिने सन्देश मेलाले प्रस्तुत गरेको छ।

बिहीबार बिहान दस बजेदेखि चार बजेसम्म भएको मेलामा करिब ६ सय व्यक्ति सहभागी भएको विभिषाले जानकारी दिइन्। फिदिमका स्कुले केटाकेटीका साथै बुढापाकालाई लक्ष्य गरी महिनावारी मेलाले समाजमा जरो गाडेर बसेको चलनचल्ती हटाउने लक्ष्य बोकेको थियो।

मेलामा स्थानीयबीच देखिएको सक्रिय सहभागिता आयोजकको आशाभन्दा धेरै राम्रो भएको विभिषा बताउँछिन्।

'हामीलाई पुरानै मानसिकता भएका बुढापाकाले महिनावारीलाई खुलेर स्वीकार्न नसक्ने डर थियो,' उनले सेतोपाटीसँग भनिन्, 'उहाँहरूले हाम्रो सोच गलत साबित गर्नुभयो। महिनावारीमा मन्दिर जान नहुने र छोइछाइका विषय गलत रहेको कुरा स्वयम् मान्नुभयो।'

बरू यस्ता चेतनामूलक मेला पहिले गरेर ज्ञान दिइनुपर्ने प्रतिक्रिया पाएको विभिषाले फोनवार्तामा बताइन्।

विभिषा बुढाथोकी।

यो पनि पढ्नुस्ः १९ वर्षे विभिषाले सुरू गरिन् 'महिनावारी मेला'

मेलामा प्रजनन स्वास्थ्य, सरसफाइ र महिनावारीमा आवश्यक खानपिनको विषयमा विस्तृत जानकारी दिइनुको साथै पुनः प्रयोग गर्न मिल्ने प्याडबारे स्थानीयलाई सचेत गरिएको थियो।

ती प्याडको प्रयोग र फाइदाको ज्ञान दिँदा 'इनिसिएसन फर चेन्ज' संस्थाले आफ्ना सबै प्याडका नमूना सहभागी स्थानीयलाई निःशुल्क वितरण गरेको पनि विभिषाले जानकारी दिइन्।

प्रमुख अतिथिका रूपमा उपस्थित फिदिम जिल्लाका सभापति विष्णुप्रसाद सापकोटाले यस महिनावारी मेला राष्ट्रिय तहको कार्यक्रम बन्न सक्ने बताएको पनि उनले सुनाइन्।

'प्रदेश नं १ बाट सुरू भएको यो नयाँ कदमले देशभर रहेको महिनावारीसम्बन्धी कुचलन हटाउन सक्ने क्षमता बोकेको छ,' सभापति विष्णुप्रसाद सापकोटाको भनाइ उद्धृत गर्दै विभिषाले भनिन्।

यसले आफूहरूलाई अझ सक्रिय रूपमा अघि बढ्न हौसला दिएको र सरकारी तहको संलग्नताकै कारण महिनावारीबारे भ्रम हटाउन सहज भएको उनले बताइन्।

१९ वर्षीय विभिषा 'इनिसिएसन फर चेन्ज' संस्थाकी सञ्चालकसमेत हुन्। एक महिनाअघि मात्रै संस्था सञ्चालनमा आए पनि विभिषा यसअघि पनि थुप्रै सामाजिक कार्यमा खटिसकेकी छन्।

विभिषाका अनुसार महिनावारी मेला सफल पार्न फिदिम नगरपालिकाले सहयोग गरेको छ। करिब ७० हजार रूपैयाँ बजेटको कार्यक्रमको ७० प्रतिशत जिम्मा नगरपालिकाले लिएको हो।

सबै तस्बिर सौजन्यः विभिषा बुढाथोकी/इनिसिएसन फर चेन्ज