वीरगन्जस्थित नारायणी कोभिड अस्थायी अस्पताल गण्डकमा उपचाररत् ६५ वर्षीय पुरूषको मृत्यु भएको छ।
वीरगन्ज निवासी उनको बिहीबार बिहान ८ बजे मृत्यु भएको अस्पतालका प्रवक्ता डाक्टर निरज सिंहले जानकारी दिए।
ज्वरो र श्वासप्रश्वासमा समस्या देखिएपछि उनलाई गत मंगलबार अस्तपाल भर्ना गरिएको थियो। सुरूमा आकस्मिक कक्षमा उपचार गरिए पनि बुधबार राति उनलाई अक्सिजनको कमी भएपछि भेन्टिलेटरमा राखिएको थियो।
उनको कोरोना रिपोर्ट भने आएको छैन। डा. सिंहले हिजै उनको कोरोना परीक्षणको लागि स्वाब पठाइएको जानकारी दिए।
अहिले मृतकको शव अस्पतालमै राखिएको छ।
डा. सिंहका अनुसार मृतक मुटु र मधुमेहका बिरामी समेत हुन्।
उनको ट्राभल हिस्ट्री भने देखिएको छैन। उनी वीरगन्ज बजारमै पसल गर्दै आएको भन्ने खुलेको छ।