सोमबार घरनजिकैबाट बेपत्ता भएका एक बालक भारत सीतामढीमा भेटिएका छन्।
भारतीय प्रहरीसँगको समन्वयमा सर्लाही प्रहरीले तीन वर्षे बालकलाई बिहारको सीतामढी सोनवर्षाबाट उद्धार गरेको हो।
सर्लाही मलंगवा नगरपालिका-५ भाडसरका रमेश सहनीका तीन वर्षे छोरा घरनजिकै खेलिरहेको बेला सोमबार बिहान बेपत्ता भएका थिए।
तीन वर्षीय बालक भारतसम्म कसरी पुगे भन्ने विषय ‘रहस्यमय’ रहेको प्रहरीले जनाएको छ।
मंगलबार दिउँसो १ बजे सीतामढी जिल्ला सोनवर्षा, मुसरनीयाबाट बालकलाई उद्धार गरिएको जिल्ला प्रहरी कार्यालय सर्लाहीले जनाएको छ।
बालक भेटिएको ठाउँ मलंगवाबाट करिब ९ किलोमिटर टाढा हो।
‘बालकलाई किन भारत लगियो भन्ने विषय निकै रहस्यमय छ,’ सर्लाहीका प्रहरी उपरीक्षक सन्तोषसिंह राठौरले भने, ‘यस विषयमा हामी अनुसन्धान गरिरहेका छौं।’
रमेशको विवादित गतिविधिका कारण कसैले बालकलाई भारत लग्यो वा उनी आफैंले भारत पुर्याए भन्ने पक्षबाट अहिले अनुसन्धान गरिरहेको छ।
‘रमेश विभिन्न व्यक्तिसँग पैसा लिने र नतिर्ने गर्ने गरेको पाइएको छ,’ राठौरले भने, ‘त्यसरी पैसा उठाउन आउने व्यक्तिलाई उल्टै विभिन्न आरोप लगाएर कारबाही गराउने गरेको पनि भन्ने कुरा आएको छ।’
जे भए पनि बालक बेपत्तापछि उनको सकुशल उद्धारका लागि आफूहरू संवेदनशील भएर अनुसन्धानमा लागेको राठौरले बताए।
‘भारतीय पक्षसँग समन्वय गर्यौं, बालकलाई सकुशल भेट्टाउन सकियो,’ उनले भने।
केही समयअघि महोत्तरीबाट हराएका सात किशोरी/युवती पनि सीतामढीमा भेटिएका थिए।
