पाकिस्तान क्रिकेट टिम आफ्ना दश जना खेलाडी बिना नै क्रिकेट सिरिज खेल्न इंग्ल्यान्ड प्रस्थान गरेको छ। क्रिकेट टिमका २० जना खेलाडी आइतबार पाकिस्तानको लाहोरबाट म्यानचेस्टरका लागि उडेका हुन्।
टिममा रहेका बाँक दश खेलाडीमा भने कोरोना भाइरसको संक्रमण देखिएकाले सबै खेलाडी एकै पटक इंग्ल्यान्ड जान नपाएका हुन्। इंग्ल्यान्ड र पाकिस्तानबीच आगामी अगस्ट र सेप्टेम्बरमा तीन टेस्ट र तीन टी–२० सिरिज हुँदैछ।
टिममा रहेका हैदर अली, सादब खान, हरिस राउफ, कासिफ भाटी, मोहमद हस्नइन, फखर जमान, मोहमद रिजवान, मोहमद हफिज, वाहेब रियाज र इमरान खानलाई इंग्ल्यान्ड उड्नुअघि गरिएको परीक्षणमा कोरोना संक्रमण भएको पुष्टि भएको थियो।
यी मध्ये ६ जनाको दोस्रो परीक्षणमा नेगेटिभ देखिएको छ। हफिज, रियाज, जमान, शादब खान, मोहमद रिजवान र मोहमद हस्नइनको दोस्रो परीक्षणमा नेगेटिभ देखिएको हो। कासिफ भाटी, हरिस राउफ, हैदर अली र इमरान खानको भने दोस्रो परीक्षण पनि पोजेटिभ देखिएको छ।
कोरोना लागेका खेलाडी इंग्ल्यान्ड जान योग्न हुन दुई पटक नेगेटिभ नतिजा आउनु पर्नेछ। पाकिस्तानले बाँकी रहेका खेलाडीको इंल्यान्ड भ्रमण तालिका पछि सार्वजनिक गर्ने जनाएको छ।
आइतबार इंल्यान्ड गएका पाकिस्तानका खेलाडी अब १४ दिनको आइसोलेसनमा बस्नेछन्। त्यसपछि टिमले अभ्यास थाल्नेछ। इंग्ल्यान्डविरुद्ध खेल्नुअघि टिमले चार वटा आन्तरिक वार्मअप खेल खेल्नेछ।
इंग्ल्यान्ड र पाकिस्तानबीचको पहिलो टेस्ट म्यानचेस्टरमा अगस्टमा हुने बताइएको छ। दर्शकबिनाको मैदानमा हुने खेल तालिका प्रकाशन हुन बाँकी छ।
