राष्ट्रिय खेलकुद परिषद् (राखेप) ले नेपाल क्रिकेट संघ (क्यान) को सदस्यमा मनोनीत गरेको दुई हप्ता नपुग्दै गुन्जन शाह ठकुरीलाई उक्त पदबाट फिर्ता बोलाएको छ।
राखेपले असोज १८ गते गुन्जनलाई क्यानको सदस्यमा मनोनीत गरेको जानकारी सार्वजनिक गरेको थियो। तर, राखेपको असोज २८ गतेको सदस्य सचिवस्तरीय निर्णयअनुसार उनलाई उक्त पदबाट फिर्ता गरिएको हो।
राखेपको संघसंस्था समन्वय शाखाले जारी गरेको पत्रमा नेपाल क्रिकेट संघको विधानको परिच्छेद २ को धारा ३ को उपधारा (४) मा भएको व्यवस्थाअनुसार गुन्जनलाई सदस्य पदबाट फिर्ता गरिएको उल्लेख छ।
राखेपका संघस्थाका लिलाराम बस्नेतले हस्ताक्षर गरेको उक्त पत्र नेपाल क्रिकेट संघलाई समेत बोधार्थका रूपमा पठाएको छ।
यसअघि नयाँ सरकार गठन भएपछि राखेपले छुम्बी लामालाई क्यानको सदस्य पदबाट फिर्ता बोलाएको थियो। उनको ठाउँमा गुन्जनलाई मनोनीत गरिएको थियो। तर, मनोनीत भएको दुई हप्ता नपुग्दै राखेपले उनलाई पनि उक्त जिम्मेवारीबाट फिर्ता बोलाएको हो।
गुन्जन यसअघि निवर्तमान उद्योग, वाणिज्य तथा आपूर्तिमन्त्री गौरीकुमारी यादवको स्वकीय सचिवका रूपमा कार्यरत थिइन्।
राखेपले गुन्जनलाई पदबाट फिर्ता बोलाउनुको कारण भने पत्रमा खुलाएको छैन।
शाहसँगै राखेपले ब्याडमिन्टन संघको सदस्यबाट सम्भु कार्की, सुटिङ संघको सदस्यबाट कृष्णहरी सैजु, पौडी संघको सदस्यबाट विनोद श्रेष्ठ, साइक्लिङ संघको सदस्यबाट गणेश मैनालीलाई पनि फिर्ता बोलाएको छ।
.JPG)
-1746513231.jpg)
