कोपा अमेरिका फुटबल प्रतियोगिताको आफ्नो पहिलो खेलमा अर्जेन्टिना बराबरीमा रोकिएको छ।
मंगलबार विहान सम्पन्न समूह 'ए' को खेलमा अर्जेन्टिनालाई चिलीले १-१ गोलको बराबरीमा रोकेको हो।
खेलको ५७ मिनेटमा चिलीले बराबरी गोल फर्कायो। प्राप्त पेनाल्टी चिलीका भिदालले प्रहार गरेका थिए। सो पेनाल्टीलाई अर्जेन्टिनाका गोलकिपर इमिलियानो मार्टिनेजले फर्काएका थिए। रिबाउन्डमा चिलीका भार्गासले गोल गरे।
त्यसअघि भिएआरमार्फत चिलीलाई पेनाल्टी दिने निर्णय गरिएको थियो। भिदाललाई अर्जेन्टिनाका टाग्लिआफिकोले डिबक्समा फल गरेपछि भिएआरमार्फत पेनाल्टी दिइएको थियो।
त्यसअघि खेलमा अग्रता अर्जेन्टिनाले लियो। अर्जेन्टिनाका लागि कप्तान लिओनल मेसीले खेलको ३३ मिनेटमा फ्रिकिकमार्फत उत्कृष्ट गोल गरे।
अर्जेन्टिनाका सेल्सोलाई चिलीका पुल्गरले फल गरेपछि फ्रिकिक दिइएको थियो।
त्यसअघि अर्जेन्टिनाले अग्रता लिन पाएको तीन वटा अवसर खेर फालेको थियो। मेसी, मार्टिनेज र गोल्जालेले पाएको अवसरमा गोल गर्न चुकेका थिए।
खेलको ३८ मिनेटमा पनि अर्जेन्टिनाले दोब्बर बनाउने अवसर गुमाएको थियो। अनमार्क मार्टिनेजले प्राप्त अवसरमा हानेको प्रहार आउट भएको थियो।
अर्जेन्टिना कोपा अमेरिकाको १४ पटकको विजेता हो। पछिल्लो पटक उसले १९९३ मा उपाधि जितेको थियो।
यद्यपी पछिल्ला ६ संस्करण मध्ये चार संस्करणमा अर्जेन्टिना उपविजेतामै सीमित बनेको छ।