अमेरिकी राष्ट्रपति डोनाल्ड ट्रम्पको हत्या गर्ने प्रयास भएपछि ह्वाइट हाउसका अधिकारीहरूले 'डिपार्टमेन्ट अफ होमल्याण्ड सेक्युरिटी' तुरुन्त खुलाउनु पर्ने बताएका छन्। यसै वर्ष अमेरिकामा हुने विश्वकप फुटबलको सुरक्षाका लागि यो विभाग सक्रिय हुनु ‘अति आवश्यक’ रहेको उनीहरूको भनाइ छ।
गत शनिबार वासिङ्टन डीसीको एउटा कार्यक्रममा ३१ वर्षीय कोल टोमास एलेनले राष्ट्रपति ट्रम्पलाई आक्रमण गर्ने प्रयास गरेका थिए। उनीसँग अर्ध-स्वचालित पेस्तोल, एउटा सर्टगन र तीनवटा चक्कुहरू थिए। सुरक्षा घेरा तोडेर अघि बढ्दै गर्दा उनलाई पक्राउ गरिएको थियो। यो घटनापछि ह्वाइट हाउसले आफ्नो सुरक्षा व्यवस्थाको पुनरावलोकन सुरु गरेको छ।
अमेरिकी संसदमा बजेटको विषयलाई लिएर विवाद हुँदा विगत ९ हप्तादेखि होमल्याण्ड सेक्युरिटी आंशिक रूपमा बन्द छ। डेमोक्र्याट पार्टीका सदस्यहरूले अध्यागमन विभागको बजेट रोकेका कारण यो अवस्था आएको हो। विभाग बन्द हुँदा विश्वकपका लागि भइरहेको तयारी र स्थानीय तथा संघीय एजेन्सीहरूबीचको समन्वयमा समस्या परेको अधिकारीहरूले बताएका छन्।
सन् २०२६ को विश्वकप जुन ११ देखि जुलाई १९ सम्म अमेरिका, क्यानडा र मेक्सिकोमा संयुक्त रूपमा आयोजना हुँदैछ। ह्वाइट हाउसको विश्वकप कार्यदलका कार्यकारी निर्देशक एण्ड्रयु जिउलियानीले भनेका छन्, ‘वासिङ्टनको घटनाले हाम्रो देशमा कस्ता खतराहरू छन् भन्ने कुरा सम्झाएको छ। विश्वकपमा लाखौँ पर्यटक आउनेछन्, यस्तो बेला सुरक्षा विभाग बन्द रहनु खतरनाक हुन्छ। हामी यसमा लापरवाही गर्न सक्दैनौँ।’
न्युयोर्कका सांसद माइक ललरले पनि यसमा चिन्ता व्यक्त गरेका छन्। उनले भनेका छन्, ‘विश्वकप जस्तो अन्तर्राष्ट्रिय कार्यक्रम हुँदैछ, जुन क्षेत्र आतंकवादको निशानामा पर्न सक्छ। यस्तो बेला सुरक्षा समन्वय गर्ने विभाग ११० दिनभन्दा बढी बन्द रहनु पागलपन हो।’
राष्ट्रपति ट्रम्पले पनि संसदका रिपब्लिकन सदस्यहरूलाई आगामी जुनसम्ममा यस विषयमा सहमति जुटाउन र कानुन पास गर्न आग्रह गरेका छन्। ४८ टोली सहभागी हुने यस विश्वकपको सुरक्षाका लागि यो विभागको भूमिका सबैभन्दा महत्त्वपूर्ण मानिएको छ।
