युरोपियन च्याम्पियन्स लिगको सेमिफाइनल अन्तर्गत पहिलो लेगको खेलमा आर्सनल र एट्लेटिको म्याड्रिडले १-१ गोलको बराबरी खेलेका छन्। दुवै टोलीले पेनाल्टीमार्फत गोल गरेपछि यो प्रतिस्पर्धा अब दोस्रो लेगका लागि निकै रोचक मोडमा पुगेको छ।
खेलको पहिलो हाफ सकिनु ठिक एक मिनेट अगाडि आर्सनलका भिक्टर ग्योकेरेसले पेनाल्टीमार्फत गोल गर्दै टोलीलाई सुरुवाती अग्रता दिलाए।
एट्लेटिकोका डेभिड हान्कोले उनलाई डि-बक्सभित्र लडाएपछि आर्सनलले पेनाल्टी पाएको थियो।
दोस्रो हाफमा ५६औँ मिनेटमा एट्लेटिकोले बराबरी गोल फर्कायो। बेन ह्वाइटको खुट्टामा लागेर हातमा बल सिएपछि भिडियो असिस्टेन्ट रेफ्रीको सहयोगमा एट्लेटिकोलाई पेनाल्टी दिइएको थियो। जुलियन अल्भारेजले उक्त पेनाल्टीलाई उत्कृष्ट ढंगले गोलमा परिणत गरे।
खेलको अन्तिम समयतिर आर्सनलका सब्सिच्युट खेलाडी एबेरेची एजेले अर्को पेनाल्टी पाएको जस्तो देखिएको थियो, तर भारले जाँच गरेपछि रेफ्रीले उक्त निर्णय उल्टाइदिए।
खेलको सुरुवाती समय निकै सावधानीपूर्ण रहे पनि दोस्रो हाफमा एट्लेटिकोले निकै दबाब सिर्जना गर्यो। आर्सनलका गोलकिपर डेभिड रायाले केही उत्कृष्ट बचाउ गरेर टोलीलाई हारबाट जोगाए। अर्कोतर्फ, एट्लेटिकोका एन्टोन ग्रिजम्यानको प्रहार क्रसबारमा लागेर फर्किएको थियो भने लुकम्यानले पनि गोल गर्ने सुनौलो अवसर गुमाएका थिए।
यो बराबरीपछि अब सबैको नजर अर्को मंगलबार लन्डनमा हुने दोस्रो लेगको खेलमा छ। आर्सनलले आफ्नै मैदानमा खेल्न पाउने हुनाले उसलाई केही फाइदा हुनसक्छ।
त्यसअघि, आर्सनलले शनिबार घरेलु लिगमा फुलहमसँग खेल्नेछ भने एट्लेटिको म्याड्रिडले भ्यालेन्सियाको सामना गर्नेछ।
