ओल्ड ट्राफोर्डमा भएको निकै रोमाञ्चक र उतारचढावले भरिएको खेलमा म्यानचेस्टर युनाइटेडले लिभरपुललाई ३-२ ले पराजित गरेको छ। यो जितसँगै युनाइटेड दुई वर्षपछि पुन: युरोपको प्रतिष्ठित 'च्याम्पियन्स लिग' मा छनोट हुन सफल भएको छ।
युनाइटेडका लागि युवा खेलाडी कोबी मैनूले ७७औं मिनेटमा निर्णायक गोल गर्दै जित पक्का गरे। यो गोल उनका लागि झनै विशेष रह्यो, किनकि उनले तीन दिनअघि मात्र क्लबसँग ५ वर्षको नयाँ सम्झौता गरेका थिए।
खेलको पहिलो हाफमा म्याथ्युस कुन्हा र बेन्जामिन सेस्कोको गोलको मद्दतले युनाइटेड २-० ले अगाडि थियो। तर, दोस्रो हाफ सुरु हुनेबित्तिकै लिभरपुलले आक्रामक पुनरागमन गर्यो। डोमिनिक सोबोस्लाई र कोडी गाक्पोले युनाइटेडका गल्तीहरूको फाइदा उठाउँदै खेललाई २-२ को बराबरीमा ल्याए।
खेल निकै तनावपूर्ण स्थितिमा पुगेका बेला ल्युक शको क्रसलाई लिभरपुलका डिफेन्डरले क्लियर गर्न सकेनन् र डि-बक्सको छेउमा रहेका मैनूले सिधै प्रहार गर्दै गोल गरे।
पूर्व प्रशिक्षक रुबेन एमोरिमको पालामा एउटै खेलमा पनि मौका नपाएका २१ वर्षीय मैनू अहिले क्लबका मुख्य 'स्टार' बनेका छन्। कार्यवाहक प्रशिक्षक माइकल क्यारिकले उनलाई दिएको विश्वासको अहिले जताततै प्रशंसा भइरहेको छ।
माइकल क्यारिकको नेतृत्वमा युनाइटेडले यस सिजन लिभरपुल, म्यानचेस्टर सिटी, आर्सनल, टोटनह्याम र चेल्सी जस्ता सबै 'सुपर लिग' क्लबहरूलाई हराउन सफल भएको छ। सन् २०१५-१६ को सिजनपछि युनाइटेडले लिभरपुललाई एकै सिजनका दुवै खेलमा (होम र अवे) हराएको यो पहिलो पटक हो।
