चितवन हात्ती महोत्सव (तस्बिरहरू)

निशा भण्डारी

चितवन,पुस ११

पन्ध्रौं चितवन हात्ती महोत्सव आजदेखि सुरू भएको छ।

सौराहाको बाघमारा चौरमा भएको उक्त महोत्सवको राष्ट्रपति विद्यादेवी भण्डारीले कपुरको बोटमा पानी हालेर उद्घाटन गरेकी हुन्।

आन्तरिक तथा बाह्य पर्यटन प्रवर्द्धन गर्दै लोप हुँदै गएको हात्तीको संरक्षण र यसको महत्त्वबारे जानकारी दिन तथा वन्यजन्तु संरक्षणमा एकजुट हुन आग्रह गर्दै समाजमा चेतना अभिवृद्वि गराउनु महोत्सवको मुख्य उद्देश्य रहेको आयोजक क्षेत्रीय होटल संघ सौराहाका अध्यक्ष सुमन घिमिरेले बताए।

‘जंगल र जंगली जनावर राष्ट्रका साझा सम्पत्ति भएकाले तिनको संरक्षण गर्नु हामी सबैको दायित्व हो,’ उनले भने।

महोत्सवमा हात्ती वनभोज कार्यक्रम, हात्ती छिटो हिँड्ने प्रतियोगिता, हात्तीको छावाको रोचक फुटबल प्रतियोगिता, हात्ती सुन्दरी प्रतियोगिता, हात्ती पोलो, हात्ती शृङ्गार प्रतियोगिता र राष्ट्रिय तथा स्थानीय कलाकारको विविध सांस्कृतिक कार्यक्रम गरिँदै छ।

महोत्सवका क्रममा साहित्य र पर्यटन विषयक विशेष कार्यक्रम आयोजना गरिनेछ।

यसै अवसरमा राष्ट्रपतिलाई देखाउनको लागिमात्र एमइ ट्राभल्स एण्ड टुर्स र मेगा बैंक नामक टोलीबीच प्रतिस्पर्धा भएको थियो।

आज भएको पहिलो चरणको पहिलो खेल ‘ऐलिफेन्ट फास्ट वल्क’ मा लक्की काली प्रथम भएकी छन्।