गत महिना काठमाडौंमा आयोजित पहिलो संस्करणको नेपाल टी–२० लिगपछि नेपाली क्रिकेटभित्रको विवाद अझ चुलिँदै गएको छ।
बेलाबेला विवादमा आइरहने नेपाल क्रिकेट संघ (क्यान) को पछिल्लो विवादको कारण सोही लिग बन्न पुग्यो। खेलमा 'स्पट फिक्सिङ' भएको प्रमाणित भएपछि प्रतियोगिता नै विवादमा तानियो।
सो विषयले क्यानभित्र पनि फाटो ल्यायो। टी–२० लिगमा भएका अवाञ्छित क्रियाकलापले नेपाली क्रिकेट बदनाम भएको भन्दै क्यान पदाधिकारीको राजीनामा समेतको माग उठ्यो। सात केन्द्रीय सदस्यले मंगलबार पोखरामा बसेको क्यानको बोर्ड बैठक नै बहिष्कार गरे।
क्यानको आफ्नै प्रतियोगितामा खेल मिलेमतो भएकाले यसको सम्पूर्ण जिम्मेवारी कार्यसम्पादन समितिले लिनुपर्ने असन्तुष्ट पक्षको माग छ। क्यानले लिग आयोजनाको जिम्मेवारी भारतीय कम्पनी 'सेभेन थ्री स्पोर्ट्स' लाई दिएको थियो।
क्यानका अध्यक्ष चतुरबहादुर चन्दले भने नेपाली क्रिकेटकै हित सोचेर भारतीय कम्पनीसँग सम्झौता गरिएको बताए।
सोको निर्णय गर्दा बोर्डका सबै सदस्यको सहमति रहेको उनको भनाइ छ।
'लिग सञ्चालन गर्दा भएका सामान्य प्रक्रियागत त्रुटिलाई लिएर राजीनामा नै माग गर्नु अनुचित छ,' उनले भने, 'क्यानमा अनावश्यक विवाद सिर्जना गरी नेपाली क्रिकेटको भविष्यलाई अन्धकारतिर धकेल्ने नियतले एउटा पक्ष लागेको छ।'
अध्यक्ष चन्दले क्यानको विधानले तोकेबमोजिम सदस्यको दस्तखस्त लिएर आए आफू विशेष साधारणसभा डाक्न तयार रहेको उल्लेख गरे।
'बाहिर राजीनामा माग्दै हिँडेर केही हुँदैन, क्यान आफ्नो विधानले चल्छ,' उनले भने।
आउँदो फागुनमा साधारण सभा र जेठभित्र विशेष साधारण सभा गरी निर्वाचन गर्ने निर्णय बोर्ड बैठकबाट भइसकेकाले यो विषय उछाल्न आवश्यक नरहेको अध्यक्ष चन्दले बताए।
'लिगलाई किन यति नकारात्मक पाटोबाट मात्र हेरिँदैछ? नेपाली खेलाडीले १५ दिन खेलेर १५ लाख कमाउने वातावरण बनाएको क्यानले होइन,' उनले भने, 'स्पट फिक्सिङमा संलग्न जोसुकै पदाधिकारी, खेलाडी वा कोही सदस्य भए पनि कारबाही हुन्छ।'
क्यान र सेभेन थ्री स्पोर्ट्सबीच नेपाल टी–२० लिग आयोजनाका लागि आठ वर्षको सम्झौता भएको थियो। सोबापत सेभेन थ्री स्पोर्ट्सले ३३ करोड रूपैयाँ दिने सम्झौता थियो। लिगमा स्पट फिक्सिङ भएको, खेलाडीले समयमै पैसा नपाएको, अपारदर्शिता लगायत विषयमा विवाद उत्पन्न भएको थियो।
स्पट फिक्सिङको घटनामा नेपाल प्रहरीको केन्द्रीय अनुसन्धान ब्यूरो (सिआइबी) ले क्यान र सेभेन थ्री स्पोर्ट्स कम्पनीमाथि छानबिन गरिरहेको छ। खेल मिलेमतोको आरोपमा केही खेलाडीलाई पक्राउसमेत गरिएको छ। टी–२० लिगमा भएका अवाञ्छित क्रियाकलापमा केन्द्रीय कार्यसम्पादन समिति जिम्मेवार रहेकाले राजीनामा माग गरिएको असन्तुष्ट पक्षका केन्द्रीय सदस्य ऋषिराम गौतमले बताए।
लिग लगायतका विषयमा कार्यसम्पादन समितिको बैठकबाट नै सम्पूर्ण निर्णय गरिएको र बोर्डलाई कुनै जानकारी नगराइएको उनको आरोप छ। नेतृत्व गैरजिम्मेवार बन्दा क्यान निलम्बनमा पर्ने देखिएकाले आफूहरू विरोधमा उत्रेको असन्तुष्ट पक्षको तर्क छ।
केन्द्रीय सदस्य गौतमले भने, 'राखेपले गठन गरेको छानबिन समितिको प्रतिवेदनमा क्यानले गम्भीर गल्ती गरेको निष्कर्ष निकालिएको छ। राखेपलाई क्रिकेट संघ विघटन गर्न सिफारिस गरिएको छ। क्यान निलम्बनको खतरामा छ।'
क्यानको साख र मर्यादा बचाउन सम्पूर्ण निर्णय र काम कारबाही अगाडि बढाउने कार्यसम्पादन समिति र गभर्निङ काउन्सिलका सदस्यको राजीनामा नै नेपाली क्रिकेट बचाउने एक मात्र उपाय भएको उनको भनाइ छ।
'अहिले हामीले टी–२० लिग, क्यान र सेभेन थ्री स्पोर्ट्सबीच भएको सम्झौताका बारेमा मात्र आवाज उठाएका छौं। आगामी दिनमा क्यानका अन्य विषयसमेत विस्तारै बाहिर ल्याउँदै छौं,' केन्द्रीय सदस्य गौतमले भने।
क्रिकेट संघ कास्कीका अध्यक्ष सञ्जयकान्त सिग्देलले क्यानको विवादले नेपाली क्रिकेटको विकासमा असर पुग्ने बताए। नेतृत्वले सबैलाई समेटेर अघि बढ्नुपर्ने उनको भनाइ छ।
'क्यानको विवादले नेपाली खेलकुद जगतमा राम्रो सन्देश गएको छैन, यसको बेलैमा निरुपण हुनुपर्छ,' उनले भने।
क्यानको आसन्न चुनावलाई लिएर नेतृत्वको टकराव सिर्जना भएको कतिपयको बुझाइ छ। क्यानलाई कसले हातमा लिने भन्ने दाउले सिंगं नेपाली क्रिकेटको भविष्य नै धरापमा पर्ने हो कि भन्ने चिन्ता पनि खेलप्रेमीहरूमा छ।
२०७६ असोजमा सम्पन्न भएको अधिवेशनबाट चार वर्षका लागि चन्द क्यानको नेतृत्वमा आएका थिए। उनले कार्यकाल सकिनुअगावै आउँदो जेठ मसान्तभित्र विशेष साधारणसभाको आयोजना गरी निर्वाचन गर्ने घोषणा गरेका छन्।
